आः अदालत वनेगु पाः एमालेया

येँ – माधव नेपाल नेतृत्वया नेकपा (एकीकृत समाजवादी) दर्ता यायेगु निर्वाचन आयोगया निर्णय विरुद्ध नेकपा एमाले अदालत वनीगु जूगु दु । म्हिगः च्वंगु केन्द्रीय कमिटीया बैठकं निर्वाचन आयोगं विवादास्पद निर्णय याःगु धासें कानुनी उपचार मालेगु निर्णय याःगु खः ।

पार्टीं कारबाही यायेधुंकूपिं मनूतय्त तकं ल्याः खानाः सनाखत याःगु, उपस्थित मजूपिं व हस्ताक्षर हे मयाःपिं मनूतय्गु समेत सनाखत याःगुलिं एमालें थुकियात अवैध धासें अदालत वनेत्यंगु खः । एमालेया सचिव प्रदिप ज्ञवालीं निर्वाचन आयोगया भूमिका दल विभाजनय् ग्वाहालि यायेगु मखुसें कानुन कथं निर्णय यायेगु खः तर थुगुसी अथे खने मदुगुलिं कानुनी उपचार मालेमाःगु खः धयादीगु दु ।

पार्टीं कारवाही यानाः पौ च्वयाः छ्वयेधुंकूपिं सांसदपिंत तकं पदमुक्त मयाःगु सभामुखया गल्ती जूगु खः धासें उकियात नं कानुनसम्मत संसदीय अभ्यास कथं विरोध यायेगु खँ नं ज्ञवालीं धयादीगु दु । स्थानीय जनप्रतिनिधितय्सं नं दल ल्यये दइगु राजनीतिक दल सम्बन्धी अध्यादेशया व्यवस्था संविधानया मर्म विपरीत जूगुलिं एमालें उकिया विरुद्ध नं रिट तयेत्यंगु दु ।

म्हिगःया केन्द्रीय कमिटीया बैठकं माधव नेपाल पुचःलिसे जूगु १० बुँदे सहमति अनुमोदन यासें तत्काल कार्यान्वयनय् यंकेगु निर्णय नं याःगु दु ।