सरकारय् वंसां संघर्ष जारी दनि ः उपप्रम यादव

येँ – उपप्रधान तथा स्वास्थ्यमन्त्री उपेन्द्र यादवं संघीय समाजवादी फोरम नेपालं संघर्षया लँपु अझं मत्वःतागु खँ धयादीगु दु । वयेधुंकूगु उपलब्धीया रक्षा यायेत व उकी हे दनाः काये ल्यं दनिगु अधिकार कयाः मधेसया विकास फोरम सरकारय् वनागु खँ वय्कलं कनादीगु दु ।

फोरमया पर्सा जिल्लां ग्वसाः ग्वःगु हना ज्याझ्वलय् न्ववायेगु झ्वलय् वय्कलं उगु खँ धयादीगु खः । कम्युनिष्ट सरकारय् सामेल जुइबलय् दुई तिहाइ बहुमत थ्यनीगु खनेदत, दुई तिहाइ बहुमतं जक संविधान संशोधन याये फइगु जूगुलिं उपिंलिसें ल्हाः मिले यायेत बाध्य जूगु खँ नं वय्कलं धयादिल ।

वय्कलं धयादिल, ‘पहलमान ल्वायेगु इलय् नं ल्वायेगु स्वयां न्ह्यः ल्हाः हे मिले याइ । वयां लिपा ला खः धेंधेंबल्लाः जुइगु, वयेधुंकूगु उपलब्धीया रक्षा, ल्यं दनिगु अधिकार कायेगु निंतिं देश व मधेसया विकासया निंतिं रिङ दुने जिपिं दुहां वनागु दु ।’
वय्कलं वयेधुंकूगु उपलब्धी रक्षा यायेगु हे न्हापांगु आवश्यकता जूगु खँ कनादिसें उपलब्धी रक्षा याये मफइगु अवस्थाय् वयेधुंकूगु उपलब्धी नं गुमे याये मालीगु खँ धयादिल ।

वयेधुंकूगु अधिकारयात कायेगु व तागतयात बल्लाकाः ल्यं दनिगु अधिकार कायेगु थःपिनिगु रणनीति जूगु खँ नं वय्कलं कनादिल । गबलय् तक ल्यं दनिगु अधिकार गबलय् वइ छक्वलं काये धकाः सुम्क च्वंच्वन धाःसा व नं वइ मखु व भविष्य नं निश्चित मजुइगु खँ वय्कलं कनादिल ।