रमेश खरेलं बिउगु द्वपंयात कुलमान घिसिङपाखें खण्डन

येँ (नेपालभाषा टाइम्स)÷नेपाल विद्युत प्राधिकरणया कार्यकारी निर्देशक कुलमान घिसिङं विद्युत महसुल बक्यौता असुल यायेत छिनागु पलाः खनाः आँटे चाःपिं छुं मनू व संस्थां थःत कमजोर यायेत व मनोबल क्वकायेत सुनियोजित रुपय् न्ह्यानाच्वंगु खँ धयादीगु दु । नेपाल प्रहरीया पुलांम्ह डीआईजी रमेश खरेलं एन्टी करप्सन नेटवर्क मार्फत अख्तियारय् उजुरी बीवं घिसिङं उगु खँ धयादीगु खः ।

खरेलं सामाजिक सञ्जालपाखें सार्वजनिक याःगु विवरण व सञ्चार माध्यमं पिथंगु समाचार प्रति थःगु गम्भीर ध्यानाकर्षण जूगु खँ धासें घिसिङं धाःगु दु, ‘उजुरी दर्ता यायेवं उकियात सामाजिक सञ्जालपाखें सार्वजनिक यायेगु वय्कः खरेलया ज्यां उगु उजुरी वास्तवय् सार्वजनिक खपत व थः चर्चाय् वयेगु नितिं जक याःगु खः धकाः जिं थुइकागु दु । निष्ठा पूर्वक थःगु जिम्मेवारी पूवंकाच्वंम्ह मनूयात हतोत्साहित यायेत सुनियोजित रुपय् वय्कः खरेलं निहित स्वार्थया नितिं थज्याःगु ज्या यानाच्वंगु खः ।’

घिसिङं न्ह्यःने धयादीगु दु, ‘नेपाःमि जनतायात धिसिलाःगु, गुणस्तरीय, माक्व व सुरक्षित विद्युत आपूर्ति यायेगु मू आज्जुयात इमानदारीपूर्वक पूवंकाच्वंम्ह मनूयात बदनाम यायेगु दुराशय तयाः बियाहःगु उगु द्वपंयात खण्डन यानाच्वना ।’ लुमंकेबहः जू, तःधंपिं व्यापारीतय्सं मतया ध्यबा पुलेमाः धायेवं घिसिङयात थौंकन्हय् सरकारं नं लिनाच्वंगु दु ।