‘सुदूरपश्चिम कोरोना संक्रमण न्यंकेगुली दकलय् ग्यानापुगु थाय् जुइफु’

येँ – नेपालय् कोरोना भाइरस न्यंकेफुगुली दकलय् ग्यानापुगु थाय् सुदूरपश्चिम जुयाच्वंगु दु । नेपालय् कोरोना संक्रमण खनेदुपिं गुम्ह मध्ये प्यम्ह ला सुदूर पश्चिमयापिं हे लाःगु दु । थुपिं मध्ये निम्ह भारतं वःपिं खःसा छम्ह खाडी देशं वःम्ह खः । खाडी देशं वःम्हपाखें वया हे तताजुम्हेसित थ्व ल्वय् सरे जुइवं नेपाः दुने हे कोरोना भाइरसं संक्रमण जूगु नं न्हापांखुसी सुदुरपश्चिमय् हे खनेदुगु दु ।

सुदूरपश्चिमय् कोरोना संक्रमितत मेथाय् स्वयां यक्व खनेदुगुलिं जक सुदूरपश्चिम संक्रमण न्यंकेगुली ग्यानापुगु थाय् जुयाच्वंगु मखु । दकलय् ग्यानापुगु ला थन भारतं दुहां वःपिं मनूतय् कारणं जुयाच्वंगु खः । कारोनाया संक्रमण सुरु जुइधुंकाः भारतं जक लछिया दुने थ्यंमथ्यं छगूत्या लाख मनू सुदूरपश्चिम दुहां वःगु दु । थथे दुहांवःपिं मनूतय् स्थिति गथे दु धयागु सुदूरपश्चिम प्रदेश सरकार, केन्द्रीय सरकार, स्थानीय सरकार सुनां नं मसिउ । वःपिं मध्ये लगभग झिगू प्रतिशत मनूत नं क्वारेन्टाइनय् मदु । थ्व हे कारणं दकलय् ग्यानापुगु स्थिति जुयाच्वंगु खः ।

शुक्रवाः कोरोना संक्रमण लूम्ह छम्ह मनूया ‘ट्राभल हिस्ट्रि’ न्यनेबलय् नं भयावह स्थिति खनेदयाच्वंगु दु । उम्ह मनू भारतं नेपाः दुहां वयेत स्वःबलय् लकडाउनया कारणं दुत वयेके मबिल । अथे जूबलय् उम्ह मनू नं गौरीफन्टा नाकाय् थ्यन । गौरीफन्टाय् नेपाः दुहां वयेकेमाल धकाः भारतं वःपिं हजारौं मनूतय्सं नारा थ्वयेकल । थ्व नारा थ्वयेकाच्वंगु इलय् हजारौं मनूतय् दथुइ उम्ह संक्रमित मनूत नं दुगु खः । लिपा मन्त्रिपरिषद्या बैठक लिपा उमित दुकायेगु जुइवं २१ गः बसय् तयाः नेपाः दुतहयाः क्वारेन्टाइनय् तये हल । बसय् तयाहःबलय् वयानापं च्वनावःपिं मनूत लिसें नाकाय् नाराबाजी याःबलय् वया लिक्क लाःपिं मनूतय्त संक्रमण जुइफुगु सम्भावना यक्व दु ।

तर थज्याःगु सम्भावना यक्व दुसां सुदूरपश्चिमय् परीक्षणया ज्या धाःसा तसकं म्हो जक जूगु दु । थ्व नं मेगु ग्यानापुगु पक्ष जुयाच्वंगु दु । भारतं दुहांवःपिं छगूत्या लाख मनू दु धाःसां थन मुक्कं निसःम्हेसिया नं परीक्षण जुइफुगु मदुनि । थन आः नं परीक्षणया निंतिं मुक्कं द्वःछिगु जक किट दुगु खँ धयाच्वंगु दु । सेती प्रादेशिक अस्पतालय् च्वंगु मेसिनं न्हिं प्यंगुलिं अप्वः स्वाब परिक्षण यायेगु क्षमता मदु ।

थज्याःगु ग्यानापुगु स्थिति दुसां छुं भचा याउँक सासः ल्हायेगु थाय् छु दु धाःसा सेती अस्पतालय् जाँच याःगु थ्रोट स्वाबय् आःतक सुयागुं नं रिपोर्ट नेगेटिभ मवःनि । मंगलवाः धनगढी थ्यंगु थ्व मेसिनं शुक्रवाः निसें जक जाँच सुरु याःगु खः ।

सेती अस्पतालया वरिष्ठ फिजिसिनय डा. शुभेषराज कायस्थं बिबिसीलिसे खँ ल्हासें थन आः हथासं परीक्षण ज्या सुरु यायेमाःगु खँ धयादीगु दु । ‘आः सरकारं थनया स्थिति अनुमान यानाः याकनं गुलिफु उलि यक्व परीक्षण ज्या न्ह्याकेमाःगु दु, मखुसा विष्फोटया सम्भावना दु’, वय्कलं धयादीगु दु ।

सुदूरपश्चिम प्रदेशया सामाजिक विकास मन्त्री कृष्णराज सुवेदीं लकडाउन कडा यानाः सम्भावित संक्रमण पनेत छेँय्छेँय् वनाः पहिचान यायेगु कुतः जुयाच्वंगु खँ धयादीगु दु ।

सम्बन्धित बुखँ

LEAVE YOUR COMMENTS