बागमतिइ लामा मुख्यमन्त्री नियुक्त

येँ (नेपालभाषा टाइम्स)- बागमती प्रदेशया मुख्यमन्त्रीइ नेपाली कांग्रेस संसदीय दलया नेता बहादुर सिं लामा नियुक्त जूगु दु । प्रदेश प्रमुख यादवचन्द्र शर्मां संविधानया धारा १६८ (२) कथं मंगलवाः सनिलय् लामायात मुख्यमन्त्री नियुक्त यानादीगु खः । लामां म्हिगः हे कांग्रेसया ३७ व एमालेया २७ यानाः ६४ म्ह सांसदया समर्थनसहित प्रदेश प्रमुखयाथाय् दाबी पेश याःगु खः । लामा मुख्यमन्त्री जुइवं बागमतीइ न्हापांखुसी कांग्रेसयात सरकारया नेतृत्व यायेगु ह्वःताः चूलाःगु दु ।

नुवाकोटया लामा बागमती प्रदेशया न्याम्हम्ह मुख्यमन्त्री खः । वय्कलं बुधवाः ११ बजे प्रदेश प्रमुखया ज्याकुथिइ शपथ ग्रहण याइगु ज्याझ्वः दु । बागमतिइ आः कांग्रेसया खुम्ह व एमालेया खुम्ह सहित झिंस्वम्हेसिया मन्त्रिमण्डल दयेकीगु जूगु दु । एमालें बागमतिइ मन्त्री जुइपिनि नां क्वछीधुंकूगु दुसां कांग्रेसं धाःसा म्हिगः सनिलय् तक क्वःछिउगु मदुनि ।

एमालेपाखें प्रकाश श्रेष्ठ, अमन मास्के, प्रेम महर्जन, सुकमाया तामाङ, कृष्ण सिलवाल व किरण थापामगर मन्त्री जुइगु खँ धाःगु दु ।

२०७२ सालय् संविधान वयेधुंकाः जूगु चुनाव लिपा न्हापांगु न्यादँया दुने एमालेपाखें डोरमणि पौडेल, अष्टलक्ष्मी शाक्य, नेकपा एकीकृत समाजवादीया राजेन्द्र पाण्डे मुख्यमन्त्री जूगु खः । निक्वःगु चुनाव लिपा नेकपा माओवादी केन्द्रया शालिकराम जम्मरकट्टेल मुख्यमन्त्री जुयाच्वंगु खःसा न्हूगु समीकरण लिपा वंगु साउन ६ गते जम्मरकट्टेलं मुख्यमन्त्री पदं राजीनामा बियादीगु खः ।

बागमती प्रदेशय् नेपाली कांग्रेस व नेकपा एमाले दथुइ पालंपाः सरकारया नेतृत्व यायेगु सहमति कथं न्हापांखुसी लामा मुख्यमन्त्री जूगु खः । म्हिगः कांग्रेस व एमाले नेतातय् दथुइ ल्यं दनिगु कार्यकालय् बछि–बछि ई सरकारया नेतृत्व यायेगु सहमति जूगु खँ कांग्रेसया प्रमुख सचेतक गोविन्द लम्सालं कनादीगु दु । वय्कःया कथं प्रदेशसभाया ई आः ४१ ला ल्यं दनि । कांग्रेस व एमाले दथुइ २०–२० ला सरकारया नेतृत्व यायेगु सहमति जूगु खः ।