आवंलि टेकुइ फोहर मुंका मतइगु

येँ – येँ महानगरपालिकां आवंलि थनया टेकुइ च्वंगु ट्रान्सफर स्टेशनय् फोहर ममुंकीगु जूगु दु । येँ मनपां छुं ईया निंतिं फोहर तःसा आवंलि न्हापालिपा थें ताःई तक उगु थासय् फोहर मुंकाः तयेगु ज्या धाःसा मयाइगु जूगु दु । ट्रान्सफर स्टेशनय् ताःईतक फोहर मुंका तयेबलय् वातावरण प्रदूषणया समस्या ब्वलंगु धासें येँ मनपां आः छुं ईया निंतिं उगु थासय् फोहर मुंकीगु जूगु दु ।

येँ मनपाया प्रमुख प्रशासकीय अधिकृत केदार न्यौपानें छुं ईया निंतिं जक ट्रान्सफर स्टेशनय् फोहर मुंकेगु व आवंलि ताःई तक फोहर मुंका तयेगु ज्या जुइमखु धासें व हे कथं कर्मचारीतय्त ज्या यायेत नं निर्देशन बियादीगु दु । विगतया इलय् येँ देय्या सतक, गल्ली, चुक, ननि आदि थासं मुना हःगु फोहर ट्रान्सफर स्टेशनय् लां लां तक नं तया तयेगु यानातःगु खः ।

येँ महानगरया थीथी थासं मुना हःगु फोहर थुगु थासय् मुंका तयेधुंकाः अज्याःगु फोहरयात हाकनं ततःग्वःगु सवारी साधनपाखें नुवाकोटय् च्वंगु ल्याण्डफिल साइटय् व्यवस्थापन यायेगु याना वयाच्वंगु खः ।

उखे येँ मनपा अन्तर्गतया वातावरण विभागया प्रमुख हरिकुमार श्रेष्ठं नं ट्रान्सफर स्टेशनय् ताःईतक फोहर मुंका तयेगु जुइमखु धासें प्राविधिकरुपं छुं समस्या वल धाःसा उकिया मिले यायेत छन्हुतक तये फइगु जानकारी बियादिल । ‘वयां लिपा ट्रान्सफर स्टेशनय् फोहर तयातयेगु जुइमखु’ विभागया प्रमुख श्रेष्ठं धयादिल ।