प्रत्यक्ष निर्वाचित कार्यकारी प्रणालीइ वनेगु प्रस्ताव

येँ (नेपालभाषा टाइम्स)- प्रतिनिधिसभाय् विश्वासया मत काये मफयेवं प्रधानमन्त्री पुष्पकमल दाहाल पदमुक्त जूगु दु । दाहालं सरकारया नेतृत्वय याःगु झिंच्यालाया दुने न्याक्वःखुसी म्हिगः प्रतिनिधिसभाय् विश्वासया मत काःगु खः ।

प्रतिनिधिसभाया म्हिगःया बैठकय् २५८ सांसद मध्ये दाहालयात ६३ मत वंगु खः । प्रधानमन्त्री जुइत माःगु १३८ मत काये मफयेवं दाहाल पदमुक्त जूगु खः । दाहालया विपक्षय् १९४ मत लाःगु खःसा छम्हेस्यां मत मबिउगु खः ।

संसदया निगू तःधंगु दल एमाले व कांग्रेस दथुइ वंगु असार १७ गते न्हूगु समीकरण दयेकेगु सहमति जुइवं सत्ता समीकरण हिउगु खःसा १९ असारय् एमालें प्रधानमन्त्री दाहालयात बियातःगु समर्थन लित काःगु खः । एमालें समर्थन लित कायेवं संवैधानिक व्यवस्था कथं दाहालं म्हिगः विश्वासया मत काःगु खः । संविधानया धारा १०० (२) य् प्रधानमन्त्रीं प्रतिनिधित्व यानाच्वंगु दल विभाजित जुल धाःसा वा सरकारय् ब्वति काःगु दलं थःगु समर्थन लित काल धाःसा ३० न्हुया दुने प्रधानमन्त्रीं विश्वासया मतया नितिं प्रतिनिधिसभाय् प्रस्ताव तयेमाःगु व्यवस्था दु । थ्वहे व्यवस्था कथं दाहालं म्हिगः विश्वासया मत काःगु खः ।

विश्वासया मत काये न्ह्यः प्रधानमन्त्री दाहालं संसदय् सम्बोधन यायेगु झ्वलय् संविधान संशोधन यायेगु खःसा प्रत्यक्ष निर्वाचित कार्यकारी प्रणालीइ वनेत प्रस्ताव यानादीगु दु । वय्कलं संविधानया उपलब्धीयात न्हंकेत स्वयाच्वंगु धासें उकियात थम्हं प्रतिवाद यायेगु खँ धयादीगु दु ।

संसदय् सम्बोधनया झ्वलय् प्रधानमन्त्री दाहालं धयादिल, ‘संविधान संशोधन यायेगु खःसा प्रत्यक्ष निर्वाचित कार्यकारीइ वने नु । दलित व मिसातय्गु प्रतिनिधित्व अप्वयेके नु । बिपन्नया पहुँच अप्वयेकेगु नु । छिकपिंत आः २०४७ सालया लुमन्ति वयाच्वन जुइ । छु आः अन हे लिहां वनेगु खःला ?’

वय्कलं संविधान संशोधन यायेगु खःसा दलितयात १३ प्रतिशत प्रतिनिधित्व बीत प्रस्ताव यासें धयादिल, ‘मिसा, उत्पीडित, मधेशी, अल्पसंख्यकयात राज्यया निकायय् पनेगु कुतः गुगुं कथं सफल जुइ मखु, प्रतिनिधित्व हे सुनिश्चित याये नु । ५० प्रतिशत मिसापिं जुइकथं संशोधन यायेनु, झी मिजंतय्सं छु यानागु धकाः ?’

प्रधानमन्त्रीं त्वःतल बालुवाटार
प्रधानमन्त्री पुष्पकमल दाहालं पदमुक्त जुइवं म्हिगः हे प्रधानमन्त्री निवास बालुवाटार त्वःतादीगु दु । वय्कलं पदमुक्त जुइवं राष्ट्रपतियात नापलानाः थः च्वनेगु छेँय् खुमलटार झाःगु खः ।