स्वनिगः स्वयां लुम्बिनी प्रदूषित

येँ- स्वनिगय् अप्वया वनाच्वंगु सवारी चापया कारणं थनया वातावरण अतिकं प्रदूषित जूगु खँ वयाच्वंगु इलय् स्वनिगः स्वयां नं लुम्बिनीइ दकलय् अप्वः वायु प्रदूक्षण जूगु छगू तथ्य पिहां वःगु दु । वातावरण विभागं देय्न्यंकंया वायु प्रदूषणया अवस्थायात कयाः याःगु मापन लिपा उगु तथ्य पिहां वःगु खः।

विभागं वायुया अवस्थाया मापन यायेत तयातःगु दक्वं स्टेशनया दछिया तथ्यांकया आधारय् लुम्बिनी दकलय् अप्वः प्रदूषण जूगु निष्कर्ष पिकाःगु खः । थगुने जक जडान याःगु यन्त्रया दछिया अवधिया लिच्वःयात दुवाला स्वःगु इलय् लुम्बिनी दकलय् अप्वः प्रदूषण जूगु तथ्य पिहां वःगु खः ।

विभागया उपमहानिर्देशक सफला श्रेष्ठं कनादीकथं सवारी साधनलिसें उद्योग कलकारखानां पिहां वइगु कुँ व धूया कारणं लुम्बिनी प्रदूषित जूगु जक मखसे स्वनिगः स्वयां अप्वः प्रदूषण जूगु धयादिल ।

लुम्बिनी प्रदूषित जूगुया कारणं अनच्वंगु उद्योग कलकारखाना जक मखसे सीमा लागा लिक्क लाःगु भारतं तकं धू व कुँ वइगु कारणं नं लुम्बिनी प्रदूषित जूगु खः । यद्यपि लुम्बिनी लागाय् दकलय् अप्वः प्रदूषणया कारकतत्व धइगु उद्योग जूगु वय्कलं धयादी ।

लुम्बिनी दकलय् अप्वः प्रदूषित जूसां लुम्बिनी लागां हे पिहां वइगु धू व कुँया मात्रा छु गुलि दु व भारतं वइगु मात्राया स्थिति छु दु धइगु बारे धाःसा अध्ययन जुइ फुगु मदुनि । छु गुगु उद्योगं गुलि व गज्याःगु फोहर पिहां वइ धइगु खँय् विस्तृत रुपं अध्ययन यायेमाःगु वय्कःया धापू दु ।

स्वनिगलय् बर्खाया इलय् स्वयां चिकुलाया इलय् वायु प्रदूषणया मात्रा अप्वइगु जुयाच्वंगु दुसा स्वनिगः, पर्यटकीय सहर पोखरा व सौराहाय् प्रदूषणया मात्रा दकलय् अप्वः दु । प्रदूषण मापनया निंतिं स्वनिगलय् जक न्हय्गू थासय् स्टेशन तयातःगु दुसा पोखराय् स्वंगू, धौख्यः, सौराहा व लुम्बिनीइ छगू छगू स्टेशन दु ।