किपू नगरपालिकाय् न्यायिक इजलास कक्ष

किपू (नेपालभाषा टाइम्स) – किपू नगरपालिकाय् नं न्यायिक इजलास व मेलमिलाप केन्द्र स्थापना याःगु दु। संविधान प्रदत्त स्थानीय तहय्न्या यिक इजलास स्थापना यायेगु अधिकार कथं नगरपालिकाय् नं इजलास व केन्द्र स्थापना याःगु खः ।

किपू नगरपालिकाया प्रमुख रमेश महर्जनं आः नकतिनि इजलास व केन्द्रया उलेज्या यानादीगु खः । नगरपालिकाया उपप्रमुखया संयोजकत्वय् न्यायिक इजलास गठन जुयाः कार्य सम्पादन जुया वयाच्वंगु खःसा आः बिस्कं हे कक्ष स्थापना यायेवं थप प्रभावकारी जुइगु विश्वास याःगु दु । नगरवासीया छुं कथंया मुद्दा मामिला नगरपालिकाय् दर्ता जूगु दःसा अज्याःगु उजुरीयात दकलय् न्हापां मेलमिलाप केन्द्रं स्वइ । केन्द्रं उकिया समाधान माले मफुसा जक फयांफछि स्थानीय तहपाखें हे निकास बीगु ल्याखं न्यायिक इजलासय् यंकी ।

स्थानीयस्तरय् स्थापना जूगु थज्याःगु केन्द्र व इजलासं चिचिधंगु ल्वापु, कचवं, मुद्दा मामिलायात स्थानीय तहपाखें हे ज्यंकेगु व च्वय्या अदालततक वने म्वाःलेमा धइगु ल्याखं स्थापना याःगु खः । अदालत सरह हे मान्यता दुगु न्यायिक इजलासया संयोजकय् नगरपालिकाया उपप्रमुख व कार्यपालिकाया निर्णयकथं निम्ह दुजः दइ । मुद्दया पक्ष व विपक्ष निखेरं बहस यायेधुंकाः उपप्रमुखया इजलासं फैसला न्यंकेगु ज्या जुइ । यदि न्यायिक इजलासं याःगु फैसला थःपिंत चित्त बुझे मजूसां अनंलिपा जिल्ला, उच्च, पुनरावेदन, सर्वोच्च नं वने फइ ।