‘चौकीइ आक्रमणया त्वहःचिनाः सरकार धाःसा ‘एलर्ट’जूगु हे मदु’
येँ – प्रतिबन्धित नेत्र विक्रम चन्द नेतृत्वया नेकपां सोलुखुम्बुस्थित विकट क्षेत्रया प्रहरी चौकीइ आक्रमण यात धकाः समाचार वःगु खःसां नं उकियात पुष्टि यायेगु आधार धाःसा खने मदुनि । जिल्लाया महाकुलुङ गाउँपालिका– ३, छेस्कामय् म्हीग बहनी विप्लवया कार्यकर्तातय्सं प्रहरी चौकी कब्जा यायेगु कथं आक्रमणया कुतः याःगु व उकिया अग्रिम सुचं वयेवं अन च्वनाच्वंपिं प्रहरीत चौकी त्वःताः बिसिउँ वंगु धकाः समाचार वःगु खः ।
तर विप्लव पुचलं धाःसा उकियात खण्डन याःगु दु । विप्लव पुचःया प्रवक्ता खड्गबहादुर विश्वकर्मा ‘प्रकाण्डं’ सुरक्षा निकाय आक्रमण यायेगु पार्टीया नीति मदुगु दावी यानादीगु दु । म्हिगः छगू प्रेस विज्ञप्ति जारी यासें प्रकाण्डं सोलुखुम्बुया चौकीइ जूगु आक्रमणया खण्डन यानादीगु खः ।
प्रेस विज्ञप्तिइ धयातःगु दु, ‘जिमिगु पार्टीपाखें प्रहरी चौकीइ आक्रमण जूगु धइगु नियोजित व षडयन्त्रपूर्ण प्रचारवाजी प्रति जिमिगु ध्यानाकर्षण जूगु दु ।’ विज्ञप्तिइ प्रहरी चौकीइ गुगुं नं कथंया घटना मजूगु धासें पूर्वी नेपालय् दमन यायेगु सरकारी षडयन्त्र कथं ‘फेक न्युज’ दयेकाः सार्वजनिक याःगु दावी नं यानातःगु दु ।
म्हिगः आकाझाकां सोलुखुम्बुया विकट क्षेत्रय् आक्रमणया कुतः जूगु समाचार वःगु खःसां नं उगु प्रहरी चौकीइ च्वंगु भ्वं छकू तकं छुं मजूगु खँ स्वयम् प्रहरीं धयाहःगु दु । प्रहरी चौकीइ आक्रमणया कुतः जूगु धासें म्हिगः सरकारं उगु लागाय् नेपाल प्रहरी व सशस्त्र प्रहरी यानाः न्यय्म्ह प्रहरी हेलिकप्टर मार्फत परिचालन याःगु खः ।
तर विप्लव पुचलं धाःसा चौकी आक्रमणया त्वहः चिनाः थःपिंत सिधयेकेगु योजना कथं समाचार वःगु दावी याःगु दु । थ्व सरकारया योजना कथं ज्या जूगु दावी नं विप्लव पुचलं याःगु दु । सोलुखुम्बु घटनाया सार्वजनिक जुइवं गृहमन्त्री रामबहादुर थापां स्वंगुलिं सुरक्षा निकायया प्रमुखपाखें ब्रिफिङ काःगु दु ।
गृहमन्त्री थापां नेपाल प्रहरी प्रमुख महानिरीक्षक सर्वेन्द्र खनाल, सशस्त्र प्रमुख शैलेन्द्र खनाल व राष्ट्रिय अनुसन्धान विभागया प्रमुख गणेश अधिकारीं घटनाया बारे गृहमन्त्री थापायात ब्रिफिङ याःगु खः ।
सुरक्षा निकायया ब्रिफिङ लिपा आवश्यकता कथं देय्या विकट क्षेत्रय् दुगु प्रहरी कार्यालययात थप ग्वाहालि छ्वयेत गृहमन्त्री थापां निर्देशन बिउगु दु । सहलहया झ्वलय् विप्लव नेता कार्यकर्तायात लक्षित यानाः पहाडी क्षेत्र प्रहरी व सशस्त्रया मंकाः अपरेशन चले यायेगु बारे खँल्हाबल्हा जूगु खः ।
LEAVE YOUR COMMENTS