तबः (ताम्राकार) समाजया हनेज्या

येँ(नेपालभाषा टाइम्स)- तबः (ताम्राकार) समाजं एसइइ व प्लस टु पास जूपिं समाजया ब्वँमिपिंत वंगु शनिवाः छगू ज्याझ्वः यासें हनेज्या याःगु दु । समाजया नायः सूर्यरत्न ताम्राकारया सभापतित्वय् जूगु ज्याझ्वलय् येँ महानगरपालिका २० वडाअध्यक्ष राजेन्द्र मानन्धर मूपाहांकथं झायादीगु खः ।

समाजया न्वकु प्रवेशमान ताम्राकारं लसकुस यानादीगु ज्याझ्वलय् एसइइ व प्लस टु उत्तीर्ण यानादीपिंत ताम्राकार मिसा पुचलं नेवाः परम्पराकथं ख्यें सगं बिउगु खः । मूपाहां २० वडाअध्यक्ष मानन्धरं एसइइ व प्लस टु उत्तीर्ण यानादीपिं दसिपौ लःल्हानादीगु ज्याझ्वलय् समाजया नायः सूर्यरत्नं खादा क्वखायेकादीगु खःसा न्वकु प्रवेशमानं मतिनाया चिंकथं मञ्जुश्रीया मूर्ति लःल्हानादीगु खः ।

ज्याझ्वलय् मूपाहां वडाअध्यक्ष मानन्धर मिसा पुचःया छ्याञ्जे लुमिन ताम्राकार, समाजया नायःलिसें ताम्राकार गुंला बाजं खलःया नायः चैतन्यराजा ताम्राकारं नं भिंतुना न्वचु बियादीगु खःसा थीथी व्यक्तिपिंसं नं व्यक्तिगत रुपं ब्वँमिपिंत उपहार लःल्हानादीगु खः ।