कोरोना रोकथाम व नियन्त्रण विषयय् अन्तरक्रिया

येँ (नेपालभाषा टाइम्स) – कोरोना भाइरस (कोभिड-१९) रोकथाम व नियन्त्रण सम्बन्धय् छगू अन्तक्र्रिया ज्याझ्वः जुल । येँ निर्वाचन क्षेत्र नं. ७ (१) पाखें बागमति प्रदेशसभा सदस्य बसन्तप्रसाद मानन्धरं उकथंया सचेतना अभियान न्ह्याकादीगु खः ।

नेपाल सरकारं जारी याःगु स्वास्थ्य मापदण्डयात प्रभावकारी रुपय् कार्यान्वयन याकेत व कोभिड-१९या कारणं समस्याय् लानाच्वंपिंत ग्वाहालि यायेगु ल्याखं नेपाल कम्युनिष्ट पार्टी (नेकपा)या केन्द्रीय दुजःतकं जुयादीम्ह प्रदेश सांसद मानन्धरं उकथं अन्तरक्रिया ज्याझ्वः न्ह्याकादीगु खः । येँ मनपा १७ वडाया खुसिबुँस्थित भ्वय् छेँय् भौतिक दूरी व स्वास्थ्य मापदण्ड पालना यानाः जूगु ज्याझ्वलय् उत्साहपूर्ण सहभागिता दुगु खः ।

ज्याझ्वलय् सांसद मानन्धर, पार्टी केन्द्रीय दुजः, येँ मनपा इन्चार्जनापं प्रतिनिधिसभा सदस्य जीवनराम श्रेष्ठ, छत्रपाति निःशुल्क चिकित्सालयया मेडिकल डाइरेक्टर डा. प्रेमलकुमार जोशी, जनस्वास्थ्य अभियन्ता सलिना शाही, येँ मनपा १८ वडाअध्यक्ष न्हुछेकाजी महर्जन, १७ वडा सदस्य बाबुराजा महर्जन लगायतं कोभिड-१९ या थीथी पक्षय् केन्द्रीत जुयाः नुगःखँ तयादीगु खः ।

येँ मनपा १७ वडा पार्टी नेता मचाराजा महर्जनया सभापतित्वय् उगु ज्याझ्वः जूगु खः । थ्व स्वयां न्ह्यः थुकथंया ज्याझ्वः वंगु असोज ९ गते नयाँबजार मल्टिभेन्युलय् जूगु खःसा थन जूगु ज्याझ्वलय् जनस्वास्थ्यविद् प्रा. डा. शरदवन्त, प्रदेश सांसद मानन्धर लगायतं नुगःखँ तयादीगु खः । थुकथंया अन्तरक्रियाआवश्यकताकथं त्वाः त्वालय् न्ह्याका वनेगु अभियानया संयोजक मानन्धरं ‘नेपालभाषा टाइम्स’ जानकारी बियादिल ।

सम्बन्धित बुखँ

LEAVE YOUR COMMENTS