‘किपू नगरपालिकाया नीति तथा कार्यक्रम व बजेटय् सुझाव बियादिसं’

येँ – किपू नगरपालिकाया मयेर रमेश महर्जनं वइगु आर्थिक दँ २०७७/०७८या नीति तथा कार्यक्रम व बजेटया बारे सुझाव व सल्लाह बीत नगरवासीतय्त इनाप यानादीगु दु । मयेर महर्जनं नगरपालिकाया नीति तथा कार्यक्रम व बजेट तयारी अवस्थाय् दुगुलिं नगरपालिकाया घोषित ज्याझ्वलय् दुथ्याकेमाःगु विषयवस्तुइ आवश्यक राय, सुझाव व सल्लहा बीत इनाप यानादीगु दु ।

किपू नगरपालिकाया प्रमुख जूगु स्वदँ दुगु लसताय् बिहीवाः बियादीगु सन्देशय् मेयर महर्जनं किपूवासीतय् सुझाव व सल्लाहपाखें ऐतिहासिक नगरयात समृद्ध दयेकेत व समृद्ध नगरया समृद्ध नागरिक जुइगु जुइकेगु अभियानय् न्हापाथें ग्वाहालि जुइगु विश्वास प्वंकादिल ।

थःगु कार्यकाल सुरु जूगु न्हापांगु न्हि निसें हे जनताया सेवाय् लगे जुयागु धयादिसें मयेर महर्जनं आः तक जनताया गुनासो मवइगु कथं ज्या न्ह्याकाच्वनाःगु खँ धयादीगु दु ।

‘जिम्मेवारी कयागु न्हापांगु न्हि निसें हे नगरया समग्र विकास निर्माण, सामाजिक उन्नयन, समावेशीकरण व सेवा प्रवाहय् यथाशक्य जनताया गुनासो मवइगु कथं ज्या यायेगुलिं प्रयत्न यानाच्वंगु दु ।’ विज्ञप्तिइ न्ह्यथनातःगु दु ।

न्हापाया सहज अवस्थाय् थें कोरोना भाइरसया संक्रमणया विश्वव्यापी महामारीया अवस्थाय् नं नगरपालिका दुने भाइरसया संक्रमण जुइ मबीगु व नियन्त्रण यायेत लगे जुयाच्वंगु खँ धयादिसें नगरप्रमुख महर्जनं स्वदँनिसें नगरपालिकाया ज्याय् ग्वाहालि यानाच्वंपिं फुक्कसित सुभाय् नं देछानादीगु दु ।

सम्बन्धित बुखँ

LEAVE YOUR COMMENTS