किपुली हार्मोनियम प्रशिक्षण अवलोकन

किपू- थन न्ह्यानाच्वंगु हार्मोनियम प्रशिक्षणया नांजाःम्ह वाद्यवादक न्हुछेबहादुर डंगोलं अवलोकन यानादीगु दु । हार्मोनियम प्रशिक्षण अवलोकनया निंतिं पाहांकथं झायादीम्ह वाद्यवादक डंगोलं उगु इलय् प्रशिक्षार्थीतय्त वाद्यवादन सम्बन्धी कक्षा नं कयादीगु खः ।

उगु इलय् डंगोलं संगीत थानाः व सयेकाः वा थ्व ख्यलय् लगे जुयाः प्वाः द्यां लाइमखु धासें थम्हं बेलायतया महारानी ऐलिजाबेथया न्ह्यःने नेवाः बाजं थानाः न्ह्यब्वयागु उगु ईया लुमन्ति नं इनादीगु खः ।

बेलायतया महारानीया न्ह्यःने नेवाः बाजं थानाः न्ह्यब्वयागु इलय् खिचा ख्वःगु प्रसंग नं न्ह्यथनादिसें वय्कलं थःके दुगु सीप दक्वं सीप न्हू पुस्तायात लःल्हाना वनेगु इच्छा यानाच्वनागु विचाः नं प्वंकादिल ।

वरिष्ठ वाद्यवादक डंगोलं हार्मोनियम प्रशिक्षण क्वचायेकाः पिदनीगु इलय् छगू तःधंगु अर्केष्ट्रा न्ह्यब्वयेमाःगु नं विचाः तयादिल ।
लिसें वय्कलं हार्मोनियम हे इनाः संगीतया प्रशिक्षार्थी उत्पादन यायेगु निंतिं नुगः क्वसायेकादीगुयात च्वछायादिसें नगर प्रमुख महर्जनयात दुनुगलंनिसें भागि यायेमाः धासें प्रशिक्षक वर्ग व प्रशिक्षार्थीत नं उकिया हकदार जूगु खँ धयादिल ।

किपू नगरपालिकाया प्रमुख रमेश महर्जनं संगीत महासागरय् दुनाच्वंम्ह वाद्यवादनया ख्यलय् अतिकं नांजाःम्ह न्हुछेबहादुर डंगोलया प्रशिक्षणय् उपस्थितिं किपुलिइ संगीतया ख्यलय् छफुति लः तना बिउगु दु धयादिल ।

नगर प्रमुख महर्जनं हार्मोनियम सयेकाः उकिया नापनापं स्यनाच्वंगु म्येँयात दाफाय् हाले फइकथंया ढाँचाय् हिला यंकेत नं इनाप यानादिल । वाद्यवादक डंगोलं धयादीथें सम्भव जूतले हार्मोनियम पिदनीगु इलय् अर्केष्ट्रा न्ह्यब्वयेत कुतः यायेगु नं प्रतिवद्धता प्वंकादिल ।

सम्बन्धित बुखँ

LEAVE YOUR COMMENTS