उदाय् समाजया नीछक्वःगु दँ मुँज्या
येँ (नेपालभाषा टाइम्स)÷ उदाय विधि व्यवहारयात सुधार याना सकसितं अःपुइमाः धइगु आज्जु ज्वनाः नीस्वनातःगु उदाय समाजया नीछक्वःगु दँमुँज्या वंगु शनिवाः क्वचाल ।
समाजया नायः नापं ज्याझ्वःया सभापति डा. रुपज्योति कसाःनं त्वाःदेवाय् मत च्याका उलेज्या यानादीगु दँमुँज्या राष्ट्रिय म्ये हाला न्ह्याकूगु खःसा समाजया न्वकु डा. प्रेमरत्न स्थापितं लसकुस यानादीगु खः ।
मुँज्याय् मूछ्याञ्जे रजनी ताम्रामारं समाजया दछिया प्रगति प्रतिवेदन न्ह्यब्वःगु खःसा दांभरिं दिव्यलक्ष्मी कसाःनं आर्थिक प्रतिवेदन न्ह्यब्वःगु खः ।
ज्याझ्वलय् उदाय समाजया थीथी कवःत— न्यत तुलाधर समितिया नायः सर्वज्ञरत्न तुलाधर, तवः समाजया नायः सूर्यरत्न ताम्राकार, श्री दिगुख्यः गुथिया नायो तारावीरसिंह तुलाधर, स्थापित खलःया नायः दीपक स्थापित, शिलाकार खलःया नायः उत्तम राज शिलाकारपिंसं उदाय सरोकारया पक्षयात कःघाना थःपिनि नुगः खँ तयादीगु खः ।
ज्याझ्वलय् शैक्षिक ख्यलय् अप्वः ल्याः हयाः ताःलाःपिं लिसें थीथी ख्यलय् योगदान याःपिंत हना, हःपाः, सिरपाः व छात्रवृति लःल्हायेगु ज्या नं जूगु खः ।
सभापतिया थासं थःगु खँ तयादीगु झ्वलय् डा. रुपज्योति कसाःनं वधि व्यवहारया नामय् न्ह्याका हयाच्वंगु ज्याखँत पाय्छि खः कि मखु धयागु खँय् सहलह ब्याकाः यदि पाय्छि मखु धयागु खःसा उकियात गथे याना सुधार याना वनेमाःगु खः धयागु खँय् न्ह्याःवनेमाःगु खँ धयादिल ।
LEAVE YOUR COMMENTS