त्वनेगु लः सम्बन्धी सचेतना तालिम

येँ- नेवाः पत्रकार राष्ट्रिय दबू येँ जिल्लाया ग्वसालय् त्वनेगु लः सम्बन्धि सचेतना तालिम ज्याझ्वः जूगु दु । बागमति प्रदेश सरकारया खानेपानी, उर्जा व सिचाइ मन्त्रालय अन्तर्गतया खानेपानी तथा सरसफाइ डिभिजन नं ५ ज्याकूया ग्वाहालिइ उगु तालिम जुयाच्वंगु खः ।

हैजाया प्रकोप नियन्त्रणलिसें उकियापाखें बचे जुइगु नापं लःजन्य ल्वय्, लः शुद्ध यायेगु व लःया संचय यायेगु विधि व तरिका बारे विज्ञतय्सं थःगु प्रस्तुति सहित तालिम बिया वयाच्वनादीगु दु ।

येँ जिल्ला दुनेया थीथी ८० गू खानेपानी उपभोक्ता समितिया पदाधिकारी व कर्मचारी यानाः मुक्कं १६० म्ह सहभागिता दुगु गोष्ठिइ छन्हुया दुने नीगू उपभोक्ता समितिपाखें पीम्हेसित तालिम बिया वयाच्वंगु दुसा उगु उपभोक्ता समितिपाखें स्थानीय जनतापिंत सचेतना विस्तार याइगु खँ ग्वसाः खलकं जानकारी बियादीगु दु ।

सचेतना ज्याझ्वः सकसिया स्वास्थ्ययात ध्यानय् तयाः खानेपानी तथा सरसफाई डिभिजन क्षेत्र नं ५या प्रमुख अनिलप्रसाद केशरी, आकासे पानी संकलन विज्ञ प्रकाश अमात्य, डा. विनिता मल्लिक, डा. बाबुराम मरासिनीं प्रशिक्षण बियादीगु खः ।

जगतसुन्दर ब्वनेकुथिइ जुयाच्वंगु थुगु सचेतना ज्याझ्वः वंगु असार १६ गते निसें कन्हय् आइतवाः तक न्ह्याइगु ग्वसाः खलकं जानकारी बियादीगु दु ।