भिंद्यः गुथिया होली गुँभ्वय्
येँ (नेपालभाषा टाइम्स)- भिंद्यः गुथि कालिमातिपाखें दँय्दसं थें थुगुसी नं होलिपुन्हिया लसताय् टेकुया पचली भैरव द्यःयाथाय् होली गुँभ्वय् न्यायेकल । चिल्लाथ्व पुन्हि (२०८० चैत्र ११ गते) आइतबाः कुन्हु जूगु होलिगुँभ्वय्या ब्यवस्थापन भिंद्यः गुथि ल्याय्म्ह पुचः व मिसा पुचलं याःगु खः ।
भिंद्यः गुथि ल्याय्म्ह पुचलं दँय्ंदसं गुथिया निम्ह मू दुजः (गुथ्याः) पिंत हनेगु याना वयाच्वंगुयात निरन्तरता ब्यूसें थुगुसी भाजु रामकृष्ण मानन्धर व भाजु बिष्णुदास मानन्धरपिंत हनेगु ज्या याःगु खः । वय्कःपिंत हना समितिया संयोजक गौतमदास मानन्धर दुजःपिं मोहनकृष्ण मानन्धर व भोगेन्द्र मानन्धरपिंसं हनेज्या यानादीगु खः ।
अथेहे गुथिया मिसा पुचः पाखें गुथिया थंजिम्ह मिसापिं मध्ये छम्हेसित हनेज्या यानाच्वंगुलि थुगुसि ७९ दँ दुम्ह मय्जु सुर्जमाया मानन्धरयात मिसा पुचःया सकल दुजःपिंसं सिन्ह तिके धुंकाः मिसा पुचःया नायः अनिता मानन्धरं हनापौ लःल्हानाः हनादीगु खःसा न्वकू शान्ति मानन्धरं पलिंगा न्ययेका हनादीगु खः ।
अथेहे केन्द्रीय मानन्धर संघया ७१ क्वःगु पलिस्था बुदिंया लसताय् जूगु मिसा टेबुल टेनिस कासाय् न्हाप जुयादीम्ह इसा मानन्धर व मिजं चेस कासाय् ल्यू जुयादीम्ह भाजु आदेश मानन्धरयात गुथिया थकाली भाजु शंकर मानन्धर व कजि तिर्थमान मानन्धरपाखें सिन्हः तिकाः खादां क्वखायेकाः सम्मान यानादीगु खः ।
होली गुँभ्वजय् केन्द्रीय मानन्धर संघया ज्यासना पुचः व नेपालभाषा कलाकारिता ख्यलय् थःगु बिस्कं पहिचान दुगु ख्वताबजि पुचः यात बिशेष पाहां कथं सःता न्ह्याःगु उगु ज्याझ्वलय् वय्कःपिंत सिन्हः तिकाः खादां क्वखायेका सम्मान यानादीगु खः । भोगन्द्र मानन्धर व रमेश मानन्धरं न्ह्याकादीगु ज्याझ्वःया निगूगु ब्वय् होलि म्हितेगु, थीथी कासा म्हितेगु नापनापं थीथी सांस्कृतिक ज्याझ्वः न्ह्यःब्वयेगु ज्या जूगु खः ।
LEAVE YOUR COMMENTS