सरकार गठनय् ‘प्याकेज सहमति’ , राष्ट्रपतिया पद तकं बार्गेनिङ

येँ (नेपालभाषा टाइम्स)- चुनाव लिपाया न्हूगु सरकार दयेकेगु लागिं गठबन्धनं तयारी शुरु याःसां उकिया नेतृत्व सुनां यायेगु धइगु खँय् धाःसा नेपाली कांग्रेस व माओवादी केन्द्रया दथुइ थःगु हे कथंया कालबिल जुयाच्वंगु खँ सीदुगु दु ।

आः दयेकीगु न्हूगु सरकारया नेतृत्व कांग्रेस व माओवादी केन्द्रं बछि बछि यायेगु सहमति दुसा उकी नेकपा (एस) पाखें नं छगू कार्यकाल सरकार चले याके बीमाः धकाः दावी याना हःगु दु । तर सहमति न्ह्यागु जूसां न्हापांगु नेतृत्व सुनां यायेगु धइगु खँय् धाःसा कांग्रेस व माओवादी दथुइ विवाद दुगु खँ सीदुगु दु ।

थ्व विवाद समाधान यायेगु लागिं आः थ्व निगू पार्टीतय्सं राष्ट्रपतिया पद समेत भागबन्डा यानाः मिले यायेत स्वयाच्वंगु खँ धाःगु दु । वर्तमान राष्ट्रपति विद्या भण्डारीया कार्यकाल क्वचायेत्यंगु दुसा वयां लिपा वइम्ह राष्ट्रपतिया पदयात समेत सत्ता समीकरणया अंग दयेकाः न्ह्याः वनेगु कथंया संवाद न्ह्यःने वनाच्वंगु खँ सूत्रं धाःगु दु ।

आः गठन जुइगु सरकारया नेतृत्व थम्हं याये दयेमाः धकाः माओवादी केन्द्रया अध्यक्ष पुष्पकमल दाहालं दावी यानाच्वंगु दु । उकिया लागिं राष्ट्रपति पद कांग्रेसयात बीत दाहाल सहमत जूगु खँ सूत्रं धाःगु दु । आः राष्ट्रपति पद यदि कांग्रेसयात वल धाःसा उकी कांग्रेस सभापति शेरबहादुर देउवायात हे नियुक्त यायेगु तकया वार्ता न्ह्याः वनाच्वंगु खँ नं धाःगु दु ।

यदि देउवा राष्ट्रपति जुइत तयार जुयादिल धाःसा कांग्रेसं प्रधानमन्त्री पदय् न्हूम्ह मनूयात हये फइगु खँ धाःगु दु । कांग्रेसय् न्हूगु पुस्तायात प्रधानमन्त्री दयेके बीमाः धकाः माग जुयाच्वंगु दु । यदि देउवा राष्ट्रपति जुयादिल धाःसा कांग्रेसय् न्हूगु पुस्तायात नेतृत्व हस्तान्तरण यायेत अःपुइगु खँ नं धाःगु दु । यदि थ्व समीकरण मिले जुल धाःसा कांग्रेसयाम्ह राष्ट्रपति व माओवादीयाम्ह प्रधानमन्त्री जुयाः सरकार गठन जुइ फइगु यक्व सम्भावना दु ।

लुमंकेबहः जू, माओवादी केन्द्रया नेता कृष्ण बहादुर महरां माओवादीं न्ह्याम्हनाप जानाः जूसां थःगु नेतृत्वय् सरकार गठन यायेफु धकाः न्ववायेवं कांग्रेस दुने समेत भुखाय् ब्वःगु खः । छुं जुयाः माओवादी एमालेपाखे लित धाःसा सरकार जक मखु राष्ट्रपति पद समेत थःगु ल्हातं फुस्के जुइफु धइगु विश्लेषण यासें कांग्रेस सहमतिपाखे वःगु खँ सूत्रं धाःगु दु । कांग्रेस व माओवादी दथुइ थज्याःगु सहमतिया रोडम्याप तयार जुइगु खने दयेवं माओवादीया मेम्ह नेता देव गुरुङं थःपिंसं एमालेलिसे मखु गठबन्धनलिसे हे जानाः सरकार दयेकी धकाः हानं मेगु धापू पित हःगु खँ नं सूत्रं धाःगु दु ।