ख्वपय् पुलुकिसि जात्रा क्वचाल

ख्वप – यँयाः पर्वया लिपांगु न्हि म्हिगः ख्वपय् पुलुकिसि जात्रा न्यायेकल । ख्वपया लाकुलाछेँ त्वालं न्ह्याइगु थ्व पुलुकिसि जात्रा नगरया बुलुचा, नासमना, वंशगोपाल इताछेँ, लाय्कू, त्रिपुरासुन्दरी, चोछेँ, भालाछेँ, नागपुखू, गःछेँ, सूर्यमढी, तचपाल, गोलमढी व सुकुलध्वाखा लागाय् चाःहिलीगु परम्परा दु । पुलुकिसि जात्रा याये न्ह्यः टौमढी इ च्वंम्ह आकाश भैरवयात बां बियाः पुजा यायेधुंकाः जात्रा शुरु जुइ ।

जात्राया झ्वलय् पुलुकिसियात वंशगोपालय् वा नकीगु, टौमढी व लाय्कुली मि पंकेगु व सूर्यमढीया तुंथिइ लः त्वकीगु प्रचलन दु । जात्राया झ्वलय् पुलुकिसिया स्वँथं मनूयात थिल धाःसा दशां कइ धकाः जात्राया इलय् स्वः वःपिं सकलें स्वं पाखें तापाक हे च्वनेगु याइ । थ्व पुलुकिसिया जात्रा लिसें ख्वपया आकाश भैरवया जात्रा, यांमत व स्वन्हु तक न्यायेकीगु मूपात्रा जात्रा नं क्वचाइ ।

देवीपुराण कथं यँयाःलिसे स्वापू दुगु थुगु पुलुकिसि जात्रा देवराज इन्द्रया काय जयन्तयात मालेत वंगु लुमन्तिइ न्यायेकेगु यानाच्वंगु खँ इतिहास लिसें संस्कृतविद पुरुषोत्तमलोचन श्रेष्ठं कनादी । ख्वपय् जात्रा याइम्ह थ्व पुलुकिसि मनू सीबलय् प्वः चिना हइगु पुलुपाखें हे दयेकीगु खः ।