येँ मनपां त्वाःबहाःया पुलांगु हे नां तया यंकीगु

येँ (नेपालभाषा टाइम्स)- येँ महानगरपालिकां येँ देय्या थीथी लागाया त्वाःबहालय् वहे थाय्या पुलांगु ऐतिहासिक नां मालाः पुनस्र्थापना याइगु जूगु दु । थुकिया लागिं यानाच्वंगु न्हापांगु चरणया अनुसन्धान ज्या क्वचाःगु दुसा थ्व ज्या पूवनेवं थीथी त्वालय् वनाः पुलांगु नांया ग्वरः समेत तइगु खँ धाःगु दु ।

थ्व झ्वलय् आः तक क्वचाःगु ज्याया बारे येँ महानगरपालिकाय् प्रस्तुतीकरण जूगु खः । उगु ज्याझ्वलय् थःगु बिचाः तसें मनपाया सम्पदा तथा पर्यटन समितिया संयोजक लिसें कामपा वडा ८ या अध्यक्ष आशामान संगतं पुलांगु नां तयेगु थ्व मयासें मगाःगु खः, थ्व ज्याय् सकलें वडा अध्यक्षतय्सं सक्रिय जुयाः ग्वाहालि यायेमाः धयादिल ।

थौंकन्हय् वडा वडाय् साहित्यकार, कलाकार, खेलाडीया नामं त्वाःया नां तयेगु गलत चलन वयाच्वंगु दु धासें वय्कलं धयादिल, ‘जिमि बाः थौंकन्हय् ८७ दँ दयेधुंकल । वय्कः पुलां जुल धकाः जिं वय्कःयात न्हूगु नां ला तये मजिल नि । नां ला वय्कःया छु खः वहे कायम जुयाच्वनी ।’

ज्याझ्वलय् येँ मनपाया लागिं थ्व अनुसन्धान यानाच्वंगु संस्था एकीकृत सहरी विकास केन्द्र (सीआईयुडी) या प्रोग्राम मेनेजर यशमान कर्माचार्यं प्रस्तुत यानादीगु खः । थःगु प्रस्तुतीकरणया झ्वलय् वय्कलं येँ देय्या पुलांगु नामय् उगु लागाया इतिहास समेत सुलाच्वनीगु जूगुलिं पुलांगु नांयात हानं पुनस्र्थापना यायेगु धइगु थनया इतिहासयात समेत हानं म्वाकेगु खः धयादिल ।

अनुसन्धान ज्याय् दुथ्याःम्ह विशेषज्ञ शरद कसाःजुं थ्व पुलांगु नां लुइकेगु लागिं ताःहाकः अनुसन्धान जूगु व फयांफछि गनं मद्वनेमा धकाः कुतः जूगु खँ कनादिल । अथे हे अनुसन्धाता कुलनाथ केसीं थ्व नां मालेगु लागिं पुलांपुलांगु थ्यासपूm, तमसुक भ्वं, अभिलेख आदिया अध्ययन जूगु खँ कनादिलसा अनुसन्धाता अस्मिता श्रेष्ठं थ्व नांया ग्वरलय् क्युआर कोड नं तयेगु व उकियात स्क्यान यानाः स्वयेबलय् अन नांया अर्थ व उकिया महत्व समेत ब्वने फइगु व्यवस्था याना तयागु जानकारी बियादिल ।

येँ मनपा सम्पदा तथा पर्यटन विभागया प्रमुख कुमारी राईं सञ्चालन यानादीगु उगु ज्याझ्वलय् थीथी वडाया वडाध्यक्षपिं नं उपस्थित जुयादीगु खः । वय्कःपिंसं नं पुलांगु नां पुनस्र्थापना यायेगु ज्याय् थःपिंसं ग्वाहालि यायेगु बचं बियादीगु खः । सीआईयुडीपाखें आःयात न्यागू वडाय् निं पुलांगु नां मालेकुले यायेगु ज्या याःगु खः । थ्व न्हापांगु चरणया ज्या क्वचायेकाः मेमेगु वडाय् नं पुलांगु नां मालेगु ज्या जुइगु खँ धाःगु दु ।