नागढुंगाया सुरुङमार्ग मेगु वालय् ‘ब्रेक थ्रु’

येँ (नेपालभाषा टाइम्स)-स्थानीय मनूतय्सं थीथी माग तयाः वंगु लछि न्ह्यवंनिसें ठप्प यानातःगु नागढुंगा–सिस्नेखोला सुरुङमार्ग दयेकेगु ज्या हानं न्ह्याइगु जूगु दु । म्हिगः भौतिक पूर्वाधार तथा यातायात मन्त्री रघुवीर महासेठ सहित स्थानीयतलिसे मन्त्रालयय् जूगु वार्ता लिपा थनिंनिसें ज्या न्ह्याकेत सहमति जूगु खः । मन्त्रालय व स्थानीयवासी दथुइ ९ बुँदे सहमति जूगु खः ।

म्हिगः जूगु सहमतिइ स्थानीय वासिन्दां मू माग कथं ल्ह्वना वयाच्वंगु त्वनेगु लःया व्यवस्था यायेगु, आयोजना दयेके क्वचायेधुंकाः सुरुङमार्ग सञ्चालनय् स्थानीय पीडितयात योग्यता व क्षमताया आधारय् ज्या बीगु जूगु खँ दु।

वंगु फागुन ६ गतेनिसें स्थानीय वासिन्दां सुरुङमार्गया धादिङ व येँ निखेरं ज्या पना बिउगु खः । स्थानीय वासिन्दां ज्या पनाबीवं वंगु फागुन २३ गते सुरुङया ‘ब्रेक थ्रु’ यायेगु ज्या अनिश्चित जूगु खः ।

आयोजनाया कथं थ्वहे छवाःया दुने ब्रेक थ्रु जुइगु खनेदु । २.६८८ किमि मध्ये २.६७४ किमि ज्या पूवने धुंकूगु दु । सुरुङ दयेकेगु ज्या क्वचायेवं ७ किलोमिटर सतक चीहाकः जुइसा नागढुंगाया पाखाय् जुइगु जाम म्हो जुइ ।