आयोगयात देउवाया प्रहार

येँ- नेपाली कांग्रेसया सभापति शेरबहादुर देउवां नेकपाया वैधाननिकता बारे निर्वाचन आयोगं याकनं निर्णय मयाः धासें आलोचना यानादीगु दु ।
प्रतिनिधिसभा विघटनया विरुद्ध भैरहवाय् जूगु ज्याझ्वलय् न्ववासें वय्कलं निर्वाचन आयोगं निर्वाचन याये चाहे मजूगु द्वपं समेत बियादीगु दु ।

वय्कलं प्रधानमन्त्री केपी ओलीं याःगु संसद विघटनया मुद्दा सर्वोच्च अदालतय् विचाराधीन जुयाच्वंगुलिं अदालतयात थथे हे या धायेगु पाय्छि मजू धासें अदालतया निर्णय पीमाःगु खँ नं धयादीगु दु । वय्कलं धयादी, ‘अदालतं संसद् पुनस्र्थापना यायेमाः धाःसा पाय्छि जुइ, चुनाव या धाःसां नं पाय्छि हे खः ।’

सभापति देउवां प्रतिनिधिसभा विघटन जूगु खुलाया दुने चुनाव जुइमाः धासें धयादिल, ‘निर्वाचन आयोगयात मतलब हे मदु, निर्वाचन आयोगयात जिं थनं हे धयाच्वना, प्रधानमन्त्री ओलीं संसद विघटन याःगु खुलाया दुने निर्वाचन पूवंकेमाः ।’

वय्कलं निर्वाचन आयोगं चुनावया तयारी यायेत सर्वोच्च अदालतया निर्णय पीम्वाःगु खँ धासें यदि सर्वोच्च अदालतं संसद पुनस्र्थापना यायेमाः धाल धाःसा निर्वाचनय तयारी दिकूसां जिउ, तर निर्वाचन आयोगं धायेमाल खुलाया दुने चुनाव याकां त्वःते, प्रम ओलीं वैशाखय् चुनाव याके धाःगु दु, निर्वाचन आयोगं थ्व खँ छाय् मधाल ?, निर्वाचन आयोगयात कयाः शंका यायेमाःगु ई वयेधुंकल ।’

वय्कलं नेकपा दुने चुनाव चिं बारे विवाद दुगु धासें उगु सुद्र्यः चिं छगू हे दु, ओलीयात बीगु कि प्रचण्डयात बीगु धइगु निर्णय आयोगं यायेमाःगु बिचाः नं तयादिल ।

मेखे नेपाली कांग्रेसया नेता प्रकाशमान सिंहं प्रधानमन्त्रीं केपी शर्मा ओलीं थःगु तानाशाही शासन ताःहाकयेकेगु निंतिं मध्यावधि निर्वाचन घोषणा याःगु द्वपं बियादीगु दु । म्हिगः कास्कीइ जूगु ज्याझ्वलय् न्ववासें वय्कलं उगु खँ धयादीगु खः ।

नेता सिंहं धयादिल, ‘प्रम ओलीं तानाशाही शासन ताःहाकयेकेगु कथं जुइ हे मफइगु चुनावया घोषणा यानादीगु खः । शासन सत्ता ताःहाकः यायेत सुयातं नं प्रलोभनय् फँसे यायेफइ कि धकाः प्रम ओलीं चुनावया चाल म्हितूगु खः ।’

नेतां सिहं सर्वोच्च अदालतं प्रतिनिधिसभा पुनस्र्थापन याइगु विश्वास प्वंकुसें धयादिल, ‘प्रतिनिधिसभा विघटनया मुद्दा आः सर्वोच्च अदालतय् दु, आः न्यायमूर्तितय्सं न्याय बीबलय् संविधानया व्यवस्था व भावनायात कयाः बीगु विश्वास दु, म्हिगः जुजु ज्ञानेन्द्रं शाही आयोग नीस्वन, उगु इलय् अदालतं उकियात असंवैधानिक ठहर यात, आः नं असंवैधानिक ठहर याइगु विश्वास दु, जुजु ज्ञानेन्द्रया पालय् नं सेटिङया खँ वःगु खः, थौं नं वयाच्वंगु दु, तर सर्वोच्च अदालतं थःगु गरिमा कायम याइ ।’

वय्कलं संसदीय व्यवस्थाया बांलाःगु पक्ष ‘चेक एन्ड ब्यालेन्स’ खः धासें कार्यपालिकां व्यवस्थापिकाय् प्रहार यात धाःसा उकियात न्यायपालिकां भिंकेमाःगु धयादिल ।

पुलांपिं प्रन्यातय् लिसः
सर्वोच्च अदालतया अवहेलना सम्बन्धी मुद्दा फयाच्वंपिं प्यम्ह पुलांपिं प्रधानन्यायाधीशतय्सं म्हिगः अदालतय् लिखित लिसः बिउगु दु । पुलांपिं प्रधानन्यायाधीशपिं मीनबहादुर रायमाझी, कल्याण श्रेष्ठ, सुशिला कार्की व अनुपराज शर्मां सर्वोच्चय्लिखित लिसः बियादीगु खः । वय्कःपिंसं अदालतया अवहेलना मयानागु धासें संविधानं बिउगु विचार व अभिव्यक्ति स्वतन्त्रताया हक छ्यलागु लिसः बियादीगु खः।

लिखित लिसलय् संविधानया तप्यंक उल्लंघन जुइधुंकाः थःपिं मूकदर्शन जुयाच्वने मफइगु खँ नं धयातःगु दु । वय्कःपिंसं बियादीगु छगू मंकाः वक्तव्य विरुद्ध अधिवक्ता लोचन भट्टराई व धनजीत बस्नेतपिंसं थुकिं अदालतया अवहेलना जुल धासें सर्वोच्चय् रिट तःगु खः ।