रविया नियुक्तिइ असन्तुष्टि, ‘प्रहरीं छानबिन यानाच्वंम्ह मनू गृहमन्त्री जुइ जिउ ला ?’

येँ (नेपालभाषा टाइम्स)÷नेपाली कांग्रेसं उपप्रधान लिसें गृहमन्त्री रवि लामिछानेया नियुक्तियात कयाः प्रधानमन्त्री पुष्पकमल दाहालयाके लिसः फ्वंगु दु । म्हिगः च्वंगु प्रतिनिधिसभा बैठकय् कांग्रेसया प्रमुख सचेतक रमेश लेखकं प्रहरी अनुसन्धानया दायराय् लानाच्वंम्ह मनूयात गृहमन्त्री दयेके जिउ लाकि मजिउ धकाः लिसः फ्वंगु खः ।
सांसद लेखकं सदनय् न्ववासें धयादिल, ‘नियुक्त जुया वःपिं मन्त्रीत गुगुं नं थासं अनुसन्धानया दायरा दुने मलाःपिं जुइ धइगु आशा याना । यदि लात धाःसा वयां लिपा सदनय् छु जुइ धइगु खँया लिसः नं प्रधानमन्त्रीं बिउसा बांलाः ।’

रास्वपाया सभापति समेत जुयादीम्ह गृहमन्त्री लामिछाने विरुद्ध सहकारी ठगीया द्वपनय् प्रहरीया केन्द्रीय अनुसन्धान ब्युरों अनुसन्धान यानाच्वंगु दु । लिसें राहदानी दुरुपयोगय् नं वय्कः विरुद्ध सर्वोच्च अदालतय् मुद्दा लानाच्वंगु दुसा प्रधानमन्त्री कार्यालय मातहत दुगु सम्पत्ति शुद्धीकरण विभागं नं लामिछाने विरुद्ध सम्पत्ति शुद्धीकरणय् छानविन यानाच्वंगु दु ।

थुकथं थीथी प्रकरणय् ल्हाः दुम्ह रवि लामिछानेयात गृह मन्त्रालयया जिम्मेवारी बिउगु खँय् अधिकारकर्मीतय्सं नं विरोध याःगु दु । जवाफदेहिता निगरानी समितिया संयोजक चरण प्रसाईं म्हिगः छगू विज्ञप्ति पिकासें सहकारी थेंज्याःगु गम्भीर विषयया पीडिततय्सं लामिछाने विरुद्ध बिउगु उजुरीयात कयाः नेपाल प्रहरीं यानाच्वंगु अनुसन्धान क्वमचायेकं वय्कःयात उपप्रधान लिसें गृहमन्त्री नियुक्त याःगुलिं आपत्ति प्वंकादीगु दु ।

प्रसाईंया विज्ञप्तिइ धयातःगु दु, ‘गृह मन्त्रालयय् रवि लामिछानेया नियुक्तिं स्वार्थया द्वन्द्वया स्थिति ब्वलंगु दु । थ्व नियुक्ति पुष्पकमल दाहाल नेतृत्वया सरकारं शुरुंनिसें ‘सुशासन’ या प्रत्याभूति यायेगु धकाः सार्वजनिक रुपं प्वंकूगु बिचाः व सांसद रवि लामिछानें निष्पक्ष अनुसन्धान व सुशासनया पक्षय् बारम्बार बिया वयाच्वंगु अभिव्यक्ति अःखः जूगु दु ।’

लामिछानेया नियुक्तिं अनुसन्धान प्रक्रियाय् लिच्वः लाकीगु व प्रहरी संगठनं याइगु अनुसन्धानया विश्वसनीयता तकं गम्भीर न्ह्यसः ब्वलनीगु खँय् सरकारयात सचेत याःगु दु ।
लुमंकेबहः जू, सहकारी प्रकरणय् बिसिउँ वनाच्वंम्ह जेबी राईयात माल धाःसा थम्हं तुरुन्त ज्वनेफु धकाः लामिछानें धयादीगु खः । राई वय्कःया हे पासा खः । निवर्तमान गृहमन्त्री नारायणकाजी श्रेष्ठं थःगु कार्यकालय् नकली भूटानी शरणार्थी, ललिता निवास आदि थेंज्याःगु आपालं काण्डया पर्दाफास यानाः बय्बय् जुयादीगु खःसा लामिछानें अज्याःगु लोकप्रियता कायम याना तये फइ वा मफइ धइगु नं न्ह्यसः पिहां वःगु दु ।