पूण्य तिथिइ हिदान ज्याझ्वः

येँ- समाजसेवी मदुम्ह महेशप्रसाद मानन्धरया झिंछक्वःगु पुण्यतिथिया झ्वलय् शनिवाः येँ लाय्कुया बसन्तपुली हिदान ज्याझ्वः जुल । आख्यानकार मथुरा सायमि मूपाहाँ कथं झायादीगु उगु ज्याझ्वलय् ४९ म्हेसिनं हिदान याःगु खः । ज्याझ्वलय् मू पाहाँ साय्मियात पलिंगां न्ययेकाः बिशेष सम्मान नं याःगु खः ।

थः मदयावंपिं छेँजःया नामय् यायेमाःगु परम्परागत संस्कार नापनापं याःगु सामाजिक ज्याझ्वलय् थः मूपाहाँ जुयाः वये दुगुलिं मूपाहाँ साय्मिं तसकं लसता प्वंकादिल । थथे मदयावंपिनिगु लुमन्तिइ सकसिनं थज्याःगु सामाजिक ज्या यानावने फुसा धाथें हे समाजय् हिउपाः हयेफइगु बिचाः नं तयादिल ।

हिदान ज्याझ्वःया ग्वसाः खलः पचलि भैरव रेष्टुराँया दुजः नापं मदुम्ह महेश प्रसाद मानन्धरया तिम्ल्याहा म्हयाय्पिं गंगा, जमुना, सरस्वतीपिंसं थःपिंत मचाबलय् हे त्वःता वंम्ह बौया नामय् थःपिं तःधि जुइधुंकाः थथे हिदान ज्याझ्वः यानाः श्रद्धाञ्जली देछानागु खँ कनादिल । थज्याःगु सामाजिक ज्याझ्वः यायेगु बिचाः न्हापा थः बौ नं यानावंगु सामाजिक ज्यां यानाः हे खः धयादिल । नापं थज्याःगु ज्या निरन्तर रुपं न्ह्याकावनेगु नं प्रतिबद्धता प्वंकादिल ।

ज्याझ्वः ताःलाकेत रेडक्रस सोसाइटी गणबहाल उपशाखाया भोलियन्टर टिमं ग्वाहालि याःगु खः । हिदान यानादीपिंत मूपाहाँ साय्मिं दसिपौ व ह्याण्ड सेनेटाइजर लःल्हानादीगु खः ।