गठबन्धन बचे जुल !
येँ (नेपालभाषा टाइम्स)- नेपाली कांग्रेसया उपसभापति पूर्ण बहादुर खड्का व महामन्त्री गगन थापां पार्टीया महासमितिइ पेश याःगु निगू दस्तावेजया कारणं खतराय् लाः वंगु गठबन्धन व गठबन्धन सरकारयात हानं ‘ट्राय्क’ य् हयेत नेतात सक्रिय जूगु दु ।
उपसभापति खड्काया प्रतिवेदनय् माओवादीपाखें याःगु जनयुद्धया कारणं देश बर्बाद जुल धइगु आशय व्यक्त याना तयेवं माओवादीं उकियात गम्भीर रुपं काःगु खःसा आः कांग्रेसलिसे गठबन्धन यानाच्वनेमाःगु आवश्यकता हे मंत धइथेंज्याःगु आशय समेत प्वंका हःगु खः ।
माओवादीं आः कांग्रेसया साथ त्वःताः हानं एमालेलिसे गठबन्धन याः वनीगु खःला धइगु खतरा ब्वलनेवं स्वयम् प्रतिवेदन तयार यानादीम्ह उपसभापति खड्कां थ्व प्रतिवेदनं गठबन्धन सरकारयात छुं लिच्वः लाकी मखु धकाः स्पष्टीकरण बियादीगु दु ।
माओवादी अध्यक्ष लिसें प्रधानमन्त्री पुष्पकमल दाहाल प्रचण्डं कांग्रेसया उगु प्रतिवेदनयात सुधार याकेगु लागिं थम्हं कुतः याये धकाः पार्टीया स्थायी समिति बैठकय् धयादीगु खः । प्रतिवेदनय् माओवादीया तीव्र असन्तोष दुगु खँ सार्वजनिक जुइवं कांग्रेस सभापति शेरबहादुर देउवां प्रतिवेदनयात परिमार्जन यायेगु इलय् उकी दुगु आपत्तिजनक खँयात संशोधन यायेगु जुइ धकाः बचं बियादीगु दु ।
म्हिगः नारायणघाटय् चितवन महानगरपालिकापाखें याःगु समारोहय् सम्बोधन यायेगु झ्वलय् नं नेकां सभापति देउवां गठबन्धन सरकारयात छुं कथंया खतरा मदुगु व प्रचण्ड नेतृत्वया सरकार हे पूरा कार्यकाल वनी धकाः न्ववानादीगु खः ।
वय्कलं अथे न्ववानादीबलय् प्रमुख प्रतिपक्षी एमालेया अध्यक्ष केपी शर्मा ओली नं उगु हे ज्याझ्वलय् दीगु खः । चितवनया मेयर रेणु दाहालं छ्वया हःगु ब्वनापौयात स्वीकार यासें अध्यक्ष ओली उगु ज्याझ्वलय् थ्यंकादीगु खः । ओलीयात रेणु दाहालया कडा आलोचकया रुपय् कायेगु याः । वय्कलं ज्याझ्वःयात सम्बोधन यायेगु झ्वलय् चितवनया विकास यायेगु ज्याय् एमालेपाखें माःगु ग्वाहालि याइ धासें दाहालया सफल कार्यकालया लागिं भिंतुना नं बियादिल ।
चितवन मनपाया ज्याझ्वलय् ओलीया उपस्थितियात अर्थपूर्ण रुपं काःगु खः । गठबन्धन दुने खटपट जूगु संकेत वःगुलिं हे थःगुपाखें ‘गुडविल गेश्चर’ क्यनेत ओली चितवन झाःगु अनुमान याना हःगु दु ।
कांग्रेस प्रतिवेदनपाखें तम्वःम्ह माओवादी केन्द्रं आः जुइगु राष्ट्रिय सभा अध्यक्षया चुनावय् थःपिंपाखें नं उम्मेदवार थनेगु धकाः निर्णय यायेधुंकूगु दु । थ्व स्वयां न्ह्यः उगु पदय् कांग्रेसया कृष्ण सिटौलायात थनेगु धकाः सामान्य सहमति जुयाच्वने धुंकूगु खः ।
LEAVE YOUR COMMENTS