बसन्तपुलिइ १०८ म्ह कन्याया पुजा

येँ- अन्तर्राष्ट्रिय सामाजिक संस्था इनर ह्वील क्लबया थीथी थासय् च्वंगु कचाया ग्वसालय् कन्यापुजा जुल । इनर ह्वील क्लब अफ कीर्तिपुर, तोखा, महालक्ष्मी व इनर ह्वली क्लब अफ मिलेनियल्सया मंकाः ग्वसालय् उगु कन्यापुजा जूगु खः ।

अन्तर्राष्ट्रिय बाल दिवसया लसताय् लाकाः क्लबया थीथी कचाया मंकाः ग्वसालय् थनया हनुमानध्वाखा लाय्कू न्ह्यःने १०८ म्ह कन्याया पुजा याःगु खः ।

बौद्ध व हिन्दू धर्म परम्पराय् कुमारि वा कन्या मिसां देय् व जनताया रक्षा याइ धइगु विश्वास यानातःगु दु । थ्व विश्वासं नेवाः समाजय् कुमारि वा कन्यापुजा यायेगु चलन दया वयाच्वंगु दु ।

पुजा सहभागि सकलें मिसा मचायात दकलय् न्हापां कुमारि जूम्हेसित येँ देय्या श्री कुमारि, श्री गणेश व श्री भैरवपाखें सिन्हः व प्रसाद बियाबिज्याःगु खः ।

अनंलि मेमेपिंसं नं सकलें कन्यायात थःथःगु इच्छाकथं दां, चकलेट, थीथी नसाज्वलं, कापी कलम लगायतया हलंज्वलं लःल्हाःगु खः ।

नेवाः समाजय् मिसातय्त कुमारि, तुलजा भवानी व सम्मानया भावं पुजा यायेगु चलन दया वयाच्वंगु दुसा थुकियात अन्तर्राष्ट्रियस्तरय् हे प्रचार प्रसा यायेगु ल्याखं कन्यापुजाया ग्वसाः ग्वयागु ग्वसाः खलः इनर ह्वील क्लब अफ कीर्तिपुरया पे्रसिडेन्ट सुशीला मानन्धरं कनादिल ।

लुमंकेबहजू, नेपालय् थुकथं कन्यापुजा यायेगु प्रचलन जुजु जय प्रकाश मल्लया पालंनिसें शुरु जूगु कथं कयातःगु दु ।

सम्बन्धित बुखँ

LEAVE YOUR COMMENTS