ख्वपय् सांस्कृतिक संग्रहालय चायेकीगु
ख्वप – ख्वप नगरपालिकां सांस्कृतिक संग्रहालय स्थापना याइगु जूगु दु । नगरपालिकां आन्तरिक आम्दानीया स्रोत जुयाच्वंगु पर्यटन उद्योगयात प्रवद्र्धन यायेगु ल्याखं सांस्कृतिक संग्रहालय स्थापना यायेगु अवधारणा न्ह्यःने हःगु खः । नगरपालिकाया न्याक्वःगु नगरसभां नीति तथा कार्यक्रम पारित यायेगु झ्वलय् ख्वप देय्या जीवनशैली, रहनसहन, संस्कृति पिज्वइकथंया सांस्कृतिक संग्रहालय स्थापना यायेगु नीति काःगु खः ।
नगरसभां पारित याःगु नीतिइ ख्वप देय्यात आन्तरिक व बाह्य पर्यटकया उत्कृष्ट गन्तव्यस्थल दयेकेगु लक्ष्य नं काःगु दुसा ख्वप महोत्सव यायेगु नं न्ह्यथंगु दु ।
नगरपालिकां ख्वप देय् चाःहिउ वइपिं पर्यटकतय् सुविधाया निंतिं पर्यटकीय क्षेत्रय् स्तरीय चःबि निर्माण, हरियाली प्रर्वद्धन यायेगु नापं सांस्कृतिक महत्वं जाःगु ख्वपया सायाःया लँपुयात पर्यटन पदमार्गया रुपय् विकास यायेगु व उकिया निंतिं आवश्यक पूर्वाधार तयार यायेगु, पर्यटकयात ताःईतक ख्वपय् च्वनाच्वनेगु वातावरण दयेकेत सनिलय् थाय्थासय् सांस्कृतिक गतिविधि न्ह्याकेगु व्यवस्था यायेगु नं नीति काःगु दु ।
थुकथंया ख्वपया मौलिक उत्पादन तगः तपुलि, जुजुधौ, हाकुपतासि, चाइचिन बजि थेंज्याःगु घरेलु व सान उद्योगयात वातावरणमैत्री धंगं प्रोत्साहित यायेत थीथी गतिविधि न्ह्याकीगु जूगु दु । ख्वपय् चाःहिउ वइपिं बाह्य पर्यटकयात सहज रुपं ख्वपया बारे जानकारी बीकेया निंतिं ल्याय्म्ह पुस्तायात अंग्रेजी, चिनिया, फ्रेन्च, जापानीज, स्पेनिस लगायत थीथी भाषाया प्रशिक्षण बीगु व नगरवासीयात ‘होम स्टे’ संचालन सम्बन्धी तालिम बीगु नं नीति तथा कार्यक्रमय् दुथ्याकातःगु दु ।
अथे हे परम्परागत व सांस्कृतिक बाजंलिसें थीथी सांस्कृतिक विधा न्हू पुस्तायात हस्तान्तरण याना वनेगु निंतिं नं प्रशिक्षण बीगु व सांस्कृतिक पुचःया मूल्यांकनया लिधंसाय् ग्वाहालि यायेगु नीति काःगु दु । थुकियालिसें सांस्कृतिक, धार्मिक, पुरातात्विक महत्वं जाःगु सतः, फल्चा, ल्वहंहिति, पुखू, तुं, बुंगाः, द्यःछेँ लगायत मेमेगु सम्पदा संरक्षण यायेगु ज्यायात नं निरन्तरता बीगु जूगु दु ।
पर्यटकया हे सुविधाया निंतिं व ख्वप देय् सुरक्षित पर्यटकीयस्थल दयेकेत पर्यटक प्रहरी परिचालन, सांस्कृतिक केन्द्र स्थापनालिसें उपयुक्त थासय् पर्यटक बसपार्कया व्यवस्था, पर्यटकीय होटल संचालन यायेत सहकारी संस्थायात उत्साहित यायेगु नीति नं काःगु दु ।
पर्यटन ख्यःयात विशेष प्राथमिकता बियातःगु नीति तथा कार्यक्रमय् सम्पदा व संस्कृति संरक्षणया खँय् विशेष बः बियातःगु दुसा घिन्तांघिसि, ख्याल, नाटक, हुलाप्याखंव मेमेगु सांस्कृतिक विधायात नं प्रतियोगितात्मक मूल्यांकन यानाः पुरस्कृति यायेगु खँ न्ह्यथनातःगु दु ।
LEAVE YOUR COMMENTS