ने. सं. ११४६ तछलाथ्व षष्ठी - सिथि नखः कुमार षष्ठी

विप्लव विरुद्धया आदेश लित कायेत माग

येँ(नेपालभाषा टाइम्स)- नेकपाया महासचिव नेत्र विक्रम चन्द विप्लव लगायतया नेतातय्त ज्वनेगु धकाः येँ जिल्ला अदालतं जारी याःगु पूर्जीयात कयाः समाजवादी मोर्चां आपत्ति प्वंकूगु दु । जिल्ला अदालतपाखें वंगु निवाः न्ह्यः पक्राउ पूर्जी जारी यासें वय्कःपिंत हाजीर जू वा धकाः निर्देशन बिउगु खः ।

थ्व झ्वलय् म्हिगः समाजवादी पार्टीत जानाः गठन यानातःगु समाजवादी मोर्चां छगू वक्तव्य जारी यासें चन्दयात ज्वनेगु धकाः जिल्ला अदालतं पक्राउ पूर्जी जारी याःगु खँयात कयाः थःपिनि गम्भीर ध्यानाकर्षण जूगु दु धकाः धाःगु दु । मोर्चाया संयोजक लिसें नेकपा एकीकृत समाजवादीया अध्यक्ष माधव नेपालं वक्तव्य पित बिसें थुकी थःपिनि सरोकार क्यनादीगु खः ।

विप्लवया पार्टीं आवंलि थःपिं सशस्त्र युद्ध वने मखुत धासें आः मूलधारया राजनीतिइ वयेगु धकाः सरकारलिसे स्वंगू बुँदे सम्झौता याःगु खः । विप्लवया पार्टीं तत्कालिन केपी ओलीया सरकारलिसे थ्व सम्झौता याःगु खः । तर आः अदालतं उगु सम्झौतायात वेवास्ता यासें पूर्जी जारी याःगु धासें समाजवादी मोर्चां थःपिं उगु सम्झौता पालना यायेत पूर्ण रुपं तयार दु व सरकारं नं उगु सम्झौता पालना यायेमाः धकाः माग याःगु दु ।

जिल्ला अदालत येँनं वंगु असोज १४ गते गोरखापत्रय् सार्वजनिक सुचं हे जारी यासें विप्लव लगायत उगु पार्टीया प्रवक्ता खड्गबहादुर विश्वकर्मा (प्रकाण्ड), माहिला लामा व राजु कार्कीया नामय् अज्याःगु निर्देशन जारी याःगु खः । वय्कःपिनि विरुद्ध थनिं प्यदँ न्ह्यः जिल्ला अदालत येँय् मुद्दा दायर जूगु खःसा आः वयाः उकियात हे कयाः थ्व निर्देशन जारी जूगु खः ।

विप्लवया पार्टीं थ्व निर्देशन विरुद्ध थःपिं हानं संघर्षय् वनेगु जुइ धकाः घोषणा यायेधुंकूगु दुसा प्रधानमन्त्री पुष्पकमल दाहालं नं अदालतया थ्व निर्देशन पाय्छि मजुल धकाः टिप्पणी यानादीधुंकूगु दु ।

माओवादी नेतातय्सं अदालतया थ्व निर्देशनयात अतिकं गम्भीर पलाःया रुपय् काःगु दु । यदि विप्लवयात जिल्ला अदालतं ज्वनाः कारवाही यात धाःसा उकियात हे नजिर दयेकाः जनयुद्धय् मनू स्याःगु द्वपं बियाः पुष्पकमल दाहाल, डा.बाबुराम भट्टराईयात समेत ज्वनेगु आदेश बी फइगु आशंका थन प्वंकाहःगु दु ।