क्यानेडियन नेवाः गुथिया प्यक्वःगु मंकाः इहि

येँ(नेपालभाषा टाइम्स)- क्यानेडियन नेवाः गुथिया ग्वसालय् प्यक्वःगु मंकाः इहि मुना क्वचाःगु दु । क्यानाडाया ब्राम्प्टन सहरस्थित त्रिवेणी देगलय् जूगु मंकाः इहि मुनाय् ५ दँ निसें ११ दँ दुपिं च्याम्ह मिसा मस्तय् इहि याःगु खः । मंकाः इहि मुनाय् आहाना श्रेष्ठ, मेघना राजभन्डारी, निभा श्रेष्ठ, कृसा श्रेष्ठ, हेजल महर्जन, प्रार्थना प्रधान, ईभाना श्रेष्ठ, सात्भिका श्रेष्ठया इहि याःगु खः ।

इहि ज्याझ्वः छन्हु न्ह्यः पितृ लुमन्तिइ श्राद्ध व धुसः याःगु खःसा अनंलि इहि याइपिं सकलें मस्तय्त लसकुुस याःगु खः । नेवाः संस्कारय् मिसा मस्तय्त याइगु थीथी संस्कारमध्ये न्हापांगु संस्कारकथं कयातःगु इहिया झ्वलय् मस्तय्त अम्बः, हाम्वःपाखें म्वःल्हुकेगु, इहि पतासि लःल्हायेगु, सिन्चा फायेकेगु, म्वःकी तयेगु, सिफं लुइगु, कन्यादान आदि ज्याझ्वः याःगु खः ।

इहिया सकतां विधि क्वचायेकाः जूगु ज्याझ्वलय् नवासें गुथिया न्हापांम्ह न्वकु विमलमान श्रेष्ठं नेवाः संस्कार, संस्कृति ल्यंका तयेत, न्हू पुस्तायात नेवाः संस्कारया बारे जानकारी बीगु व नेपालं तापाक च्वनाच्वंपिंत नेवाः संस्कारया महत्व थुइकेगु उद्देश्यं गुथिपाखें थुकथंया ज्याझ्वःयात निरन्तरता बिया वयाच्वनागु खँ कनादिल । गुथिपाखें समय्बजि, म्हपुजा, यःमरि पुन्हि थेंज्याःगु महत्वं जाःगु नेवाः संस्कार, संस्कृति जक मखसे ल्याय्म्हतय् सशक्तिकरण, स्थानीय विश्वविद्यालयलिसे समन्वय यानाः नेवाः भाय्, कला, संस्कृति, संस्कार, रीतिथिति, नखःचखः आदिया बारे अध्ययन व नेवाः संस्कृति प्रवद्र्धनया निंतिं ज्या याना वयाच्वनागु वय्कलं कनादिल ।

इहि ज्याझ्वःया कजि प्रतिमा प्रधान श्रेष्ठं ज्याझ्वः सफलतापूर्वक झःझः धायेकेत व सकतांकथंया विधि पूवंक सम्पन्न यायेगु निंतिं फक्व कुतः यानागु जानकारी बियादिल । लिसें वय्कलं ज्याझ्वः सफलतापूर्वक क्वचाःगु नापं नेपालं तापाक च्वनाः नं नेवाः संस्कार, संस्कृति संवद्र्धनया निंतिं छुं योगदान याये खंगुलिं थःगु लसता प्वंकादिल ।

इहि ज्याझ्वःया निंतिं झायादीम्ह हिन्दू सोसाइटी अफ अल्बर्टाया पण्डित यादवराम झां नेवाः संस्कार व संस्कृति ल्यंकेगु नापं प्रवद्र्धनया निंतिं गुथिं नियमित रुपं थुकथंया ज्याझ्वः याना वयाच्वंगु च्वछायेबहजू धयादिल । उगु इलय् गुथिया नायः उत्तम माकःजुं पुरोहित झायात सम्मानपत्र लःल्हानादिसें नेवाः संस्कार, संस्कृति संवद्र्धन, संरक्षण व प्रवद्र्धनया निंतिं थ्व सम्बन्धी महत्वपूर्ण जानकारी ल्याय्म्ह पुस्तायात लःल्हाये हथाय् जुइधुंकूगु विचाः तयादिल ।

गुथिया मूछ्याञ्जे डा. प्रज्वल प्रधानं गुथिया ग्वसालय् जूगु प्यक्वःगु मंकाः इहि मुना ज्याझ्वः ताःलाकेत थःथःगु थासं ग्वाहालि यानादीपिं सुभाय् देछानादिसें गुथिपाखें जुइगु मेमेगु ज्याझ्वलय् नं थुकथं हे ग्वाहालि दयाच्वनीगु विश्वास प्वंकादिल ।