लुँ काण्डय् महरायाके नं बयान
येँ (नेपालभाषा टाइम्स)÷अवैध लुँ तस्करी नियन्त्रण सम्बन्धी जाँचबुझ आयोगं माओवादीया उपाध्यक्ष कृष्णबहादुर महरायाके बयान काःगु दु । म्हिगः सिंहदरबारय् च्वंगु आयोगया ज्याकुथिइ ६० किलो लुँ व ९ किलो भेपय् तयाः लुँ तस्करी याःगु प्रकरणय् महरायाके बयान काःगु खः । आयोगं महरायाके छघौत्या बयान काःगु खः ।
महराया काय् राहुल महरा नं लुँ तस्करीइ स्वाःगु खःसा ब्युरों पुरक अनुसन्धान यानाः वयात ज्वंगु खः । राहुलयात आः पुर्पक्षया नितिं कुनातःगु दु । उकथं हे आयोगं विध ल्याबया सञ्चालक भिमकान्त भण्डारीयाके नं बयान काःगु खः । थ्व प्रकरणय् ज्वनातःम्ह तिब्बती मूलया बेल्जियम नागरिक दावा छिरिङ व विध ल्याबया सञ्चालक दथुइ खँल्हाबल्हां जूगु सीआईबीं लुइकूगु खः ।
आयोगं तस्करी प्रकरणय् प्रत्यक्ष व अप्रत्यक्ष रुपय् दुथ्याःपिं मनूतय्के बयान कायेगु ज्या यानाच्वंगु दु । थ्वहे झ्वलय् महरा व भण्डारीया नं बयान काःगु खः ।
LEAVE YOUR COMMENTS