कैलालीइ प्रहरी जवानया नं सीम्ह लुइकल

येँ (नेपालभाषा टाइम्स) – कैलालीइ तस्करतय्सं स्यानाः वांछ्वयातःम्ह असई गोविन्द विक नापं वंम्ह प्रहरी जवान रामबहादुर साउदयात नं स्यानाः मोहना खुसिइ हे वांछ्वयातःगु लुइकूगु दु। असई विकया सीम्ह लूगु स्वयां २०० मिटर तापाक खुसिइ साउदया सीम्ह लुइकूगु खः ।

शनिवाः मोटरसाइकलं गस्ती वंपिं असई विक व जवान साउदयात तस्करतय्सं हे स्याःगु अनुमान प्रहरीया दु। थ्व हे कथं प्रहरीं अनुसन्धानया निंतिं झिस्वम्हेसित ज्वनातयेधुंकूगु दु। साउदयात स्यानाः मोहना खुसिइ हे गाः खनाः गाडे यानातःगु लुइकूगु खः । प्रहरीं अनुसन्धानया निंतिं ज्वनातःपिं मध्ये छम्हेसिनं बिउगु जानकारी कथं वयात हे यंकाः साउदया सीम्ह बरामद याःगु खः । प्यन्हु न्ह्यव असई विकयात गःपतय् चक्कुं कियाः स्यानातःगु अवस्थाय् लुइकूगु खः । विक तस्करत पनेगु निंतिं तसकं सक्रिय जुयाच्वंगुलिं हे तस्करतय्सं स्याःगु अनुमान याःगु खः ।