इम्बोस्ड अनिवार्य मखु, यातायात व्यवस्था विभागं क्षमा फ्वन

येँ – यातायात व्यवस्था विभागं साउन १ गतेनिसे फुकसितं इम्बोस्ड नम्बर प्लेट अनिवार्य मयानागु स्पष्ट याःगु दु । इम्बोस्ड नम्बर प्लेट जडान यायेगु ई असार मसान्त तक जक क्वःछिनातःगु खःसां उकियात कयाः व्यापक विरोध जुइवं विभागं माफी नं फ्वंगु दु ।

विभागं म्हिगः छगू विज्ञप्ति जारी यासें थःपिनिगु आशय साउन १ गते निसें फुकसितं अनिवार्य यायेगु धयागु मखसे न्हापा हे क्वछिनातःगु निकायं इम्बोस्ड नम्बर जडान यात कि मयात उकिया जक अनुगमन यायेगु धयागु धासें न्हापाया सुचंयात कयाः स्पष्ट
याःगु खः ।

विभागं थःगु विज्ञप्तिया सुरुइ हे माफी फ्वँसें तत्कालया नितिं फुकसित अनिवार्य यानागु मखसे बाध्यकारी यायेधुंकूगु सरकारी निकाय लगायतयात जक अनुगमन यायेत्यनागु स्पष्ट याःगु दु ।

म्हिगः विभागं जारी याःगु विज्ञप्तिइ धयातःगु दु, ‘सवारी साधनय् इम्बोस्ड नम्बर प्लेट जडान यायेगु सम्बन्धय् थुगु विभागया मिति २०७९ जेष्ठ २० गते पिदंगु सुचनं आम सेवाग्राहीयात जूवंगु दुविधा व उकिं ब्वलंगु असुविधाप्रति यातायात व्यवस्था विभाग क्षमा याचना यानाच्वना । दकलय् न्हापां उगु सुचं नेपाल सरकारपाखे मिति २०७८ कार्तिक २२ गते नेपाल राजपत्रय् प्रकाशित जूगु सुचंया परिपुरक सुचं जूगु व्यहोरा स्पष्ट यानाच्वना ।’

थ्वहे झ्वलय् सरकारं इम्बोस्ड नम्बर अनिवार्य याःगु विरुद्ध युवा संघ नेपालं प्रदर्शन याःगु दु । न्हू बानेश्वरय् युवा संघया कार्यकर्तापिसं इम्बोस्ड नम्बर प्लेटया अस्वाभाविक मू व सरकारया अव्यवहारिक रवैया विरुद्ध प्रदर्शन याःगु खः ।

युवा संघया कार्यकर्तापिसं ब्यानरय् ‘राष्ट्रघाटी गोठाला हो, इम्बोस्ड नम्बर घोटाला हो, लिपि मास्न पाइदैन, इम्बोस्ड नम्बर चाहिँदैन, महँगो प्लेट चाहिँदैन, जनताको ढाड सेक्न पाइदैन’ धयागु नारा थ्वयेकाः यातायात व्यवस्था कार्यालय न्ह्यःने प्रदर्शन याःगु खः ।
यातायात विभागं इम्बोस्ड नम्बर प्लेट मतःपिंत साउननिसेंं कारबाही यायेगु धकाः ख्याच्वःसहित सुचं पिथनेवं इम्बोस्ड नम्बर तयेत एकान्तकुना व गुर्जुधाराय् तःधंगु भिड जूगु खः ।