चन्दन भराटेश्वरय् स्वसःदँ पुलांगु शिलापत्र

येँ (नेपालभाषा टाइम्स)÷येँया चन्द्रगिरि नगरपालिका वडा नं. ६ स्थित चन्दन भराटेश्वर महाद्यःया जःखः च्वंगु सम्पदा ३०० दँ स्वयां पुलांगु प्रमाण लुया वःगु दु । उगु थाय्या ऐतिहासिक तथ्य पत्ता लगे यायेगु लागिं स्थानीय जनता व जनप्रतिनिधितय्सं ताः ई न्ह्यवंनिसें इनाप याना वयाच्वंगु खः । वहे इनाप कथं पुरातत्वविद् लिसें छावनीस्थित राष्ट्रिय संग्रहालयया निर्देशक जयराम श्रेष्ठ व वडा प्रतिनिधितय्सं याना स्वःगु अध्ययनं अन ३०० दँ पुलांगु शिलापत्र लुया वःगु खः ।

अन लूगु शिलापत्रय् ने.सं. ८०९ चैत्र शुक्ल उल्लेख जुयाच्वंगु व उकी जुजु योगनरेन्द्र मल्लया नां न्ह्यथनातःगु खः । थ्व ल्याखं थ्व थाय् मल्लकालय् यल देय् अन्तर्गत लाः धइगु पुष्टि जूगु दु । शिलापत्रय् ‘नासः द्यःछेँ’ धकाः नं न्ह्यथनातःगु कारणं अन नासःद्यःया द्यःछे ँ दुगु नं स्पष्ट जूगु खँ धाःगु दु । न्हापा नासःद्यःया द्यःछेँ दुगु खःसां लिपा छुं कारणं द्यःछेँ दुना वंगु खनेदुगुलिं अन द्यःछेँया नापनापं मेमेगु नं सांस्कृतिक सम्पदात दयेमाःगु खनेदु धाःगु दु ।

अथे हे अन हे लूगु ने.सं. ८३२ या मेगु शिलालेखय् काशिनाथ भारो व शिव भारो नांयापिं मनूतय्सं गणेद्यः पलिस्था याःगु खँ न्ह्यथनातःगु नं लूगु दु ।
स्वदँ न्ह्यः थ्वहे थासय् छगू कुण्ड सफा याःबलय् अन ल्वहंहिति लुया वःगु खः । वयां लिपा स्थानीय मनूतय्सं थनया ऐतिहासिक अध्ययन याये माल धकाः इनाप यानाच्वंगु खः ।