मनपा शिक्षा प्रमुखयात स्पष्टीकरण

येँ (नेपालभाषा टाइम्स)- यँ महानगरपालिकाया मेयर बालेन साहं मनपा शिक्षा विभाग प्रमुख सीताराम कोइरालायात नं कारवाही याःगु दु । शिक्षा प्रमुख कोइरालायात स्पष्टीकरण फ्वँसें आःयात विदाय् समेत तया बिउगु दु ।

थनया मध्ये बानेश्वरस्थित रत्नराज्य लक्ष्मी माविइ कक्षा ११ य् विज्ञान विषय ब्वंके दइगु निर्णय येँ महानगरया शिक्षा समितिं याःगु धासें पौ च्वया छ्वःगु लुइवं थुकिया बारे न्हय्न्हुया दुने लिसः बीत निर्देशन बिसें थ्व विषय स्पष्ट मजूतले बिदाय् च्वनेत निर्देशन बिउगु खः ।

कोइरालां वंगु २०७९ चैत २८ गते नगर शिक्षा समितिं निर्णय याःगु धासें रत्नराज्य माध्यमिक विद्यालययात असार २० गते विज्ञान विषय कक्षा न्ह्याकेत अनुमति बिउगु पौ च्वःगु खः । तर बुझे याना स्वःबलय् शिक्षा समितिं वकुन्हुया मितिइ अज्याःगु छुं निर्णय मयाःगु खँ मेयर साहया सचिवालयं धाःगु दु ।

स्थानीय तहलय् नगर शिक्षा समितिया संयोजक नगर प्रमुख जुइगु व्यवस्था दु । कोइरालां अनुमति बीधुंकाः रत्नराज्य माविइ विज्ञान संकायय् विद्यार्थी भर्ना जुयाः ब्वंकेगु ज्या समेत न्ह्यायेधुंकूगु दु ।