न्हू सतकय् पसः तिनाः आन्दोलन, पार्किङ चीकेवं आः न्हूसतक सुना वनीगु चिन्ता
येँ (नेपालभाषा टाइम्स)- येँ महानगरपालिकां म्हिगःनिसें थनया न्हू सतक लागाय् नं पार्किङ निषेध यायेवं उकिया विरुद्ध स्थानीय व्यवसायी व छेँथुवाःतय्सं जुलुस पिकाःगु दु । म्हिगः सुथंनिसें नगर प्रहरी वयाः पार्किङस्थल पना बीवं स्थानीय व्यवसायीतय्सं पार्किङ पनेत तयातःगु बोर्ड व खिपः वांछ्वयाः विरोध प्रदर्शन याःगु खः । उमिसं पार्किङ याये दयेमाः धइगु माग यासें न्हू सतक लागा चाःहिउगु खः ।
पार्किङ निषेध विरुद्ध व्यवसायीतय्सं म्हिगः पसः तिनाः विरोध प्रकट याःगु खः । लिपा सनिलय् तिनि पसः चायेकूगु खः । उमिसं थौं नं पसः तिनाः विरोध यायेगु ज्याझ्वः दयेकूगु दु । म्हिगः व्यवसायीतय्सं याःगु प्रदर्शनय् उगु लागा लाःगु येँ मनपा २२ वडाया वडा अध्यक्ष चिनीकाजी महर्जन लिसें वडा सदस्यत नं सहभागी जुयादीगु खः ।
मनपां अवैज्ञानिक ढंगं पार्किङ चीकेगु निर्णय याःगुलिं थुकिं यानाः थःपिनिगु व्यवसाय हे समस्याय् लाइगु खँ व्यवसायीतय्सं धाःगु दु । व्यवसायीतय्सं व्यापार व्यवसाय मन्दी जुयाच्वंगु इलय् पार्किङ मन्त धाःसा झन हे थाकुइगु खँ नं धाःगु दु ।
उगु लागाया वडा अध्यक्ष चिनीकाजी महर्जनं थःके छुं हे सहलह तकं मयासे थःगु वडाय् पार्किङ चीकेगु ज्या याःगुलिं दुःख प्वंकादिल । म्हिगः नेपालभाषा टाइम्स लिसे खँ ल्हासें वय्कलं धयादिल, ‘पार्किङ चीकेगु ज्यां स्थानीय व्यवसायी व छेँथुवाःयात लिच्वः लाकी । जि स्थानीयवासीया पक्षय् दु ।’
येँ मनपाया प्रहरी प्रमुख राजुनाथ पाण्डें न्हूसतकय् जुयाच्वंगु भिडभाड म्हो यायेत पार्किङ चीकेमाःगु खँ धयादीगु दु । वय्कलं न्हूसतक वनेमाःपिंत पुलांगु बसपार्कय् निःशुल्क पार्किङया सुविधा बियागु खँ कनादिल । थ्व स्वयां न्ह्यः मनपां दरवारमार्ग व बागबजार लागाय् नं पार्किङ चीका छ्वःगु खःसा थुकिं यानाः उगु थाय्या व्यापार व्यवसाय सुनावंगु खँ पीडित व्यवसायीतय्सं धाःगु दु ।
LEAVE YOUR COMMENTS