ने. सं. ११४४ कौलाथ्व एकादशी - चालं

रुपा सुनार पुनरावेदन अदालत वनीगु ः न्याय माःगु कि द्वन्द्व ?

येँ (नेपालभाषा टाइम्स)-थःगु छेँय् क्वथा बालं मबिउ धकाः जातीय छुवाछुतया द्वपं बियाः मुद्दाय् फँसे जुइमाःम्ह येँया मय्जु सरस्वती प्रधानयात जिल्ला अदालत येँनं सफाइ बिउसां वय्कःयात मुद्दा तःम्ह दलित अभियन्ता रुपा सुनारं धाःसा अझ नं मत्वःतीगु संकेत पिहां वःगु दु । सुनारं जिल्ला अदालतया फैसला विरुद्ध उच्च अदालतय् हानं मेगु मुद्दा तयेगु धकाः तयारी यानाच्वंगु खँ पिहां वःगु दु । थ्व प्रकरणय् सञ्चार माध्यमतय्त अन्तर्वार्ता बीगु झ्वलय् सुनारं थ्व जानकारी बिउगु खः ।

तर प्रधान पक्षधर कानुनविद्तय्सं धाःसा सुनारं मेगु मुद्दा तःसां नं उपिं त्याइगु सम्भावना धाःसा मदुगु खँ धायेगु यानाच्वंगु दु । प्रधानया पक्षय् वहस यानादीम्ह कानुनविद् नरेश श्रेष्ठं उच्चय् रिट तयेगु सुनारया अधिकार खः, तर मुद्दा तःसां त्याइगु आधार मदुगु खँ धयादीगु दु ।

दलित आन्दोलनया मिखां स्वयेबलय् धाःसा आः सुनारं प्रधान विरुद्ध हानं मेगु मुद्दा तयेगु धइगु थ्व कचवंयात समाधान यायेगु मखु, अझ चर्के यायेत स्वयेगु हे जक जुइगु खनेदु । सुनार थः हे छम्ह दलित अभियन्ता खः । वाम नेता आहुतिं चायेकातःगु वैज्ञानिक समाजवादी पार्टीया कार्यकर्ता खः रुपा सुनार । दलित आन्दोलनया मू लक्ष्य खः मनूतय्त दलितप्रति जुयाच्वंगु थीत्यः मत्यः प्रथा विरुद्ध सचेत यायेगु । रुपा सुनारं प्रधान विरुद्ध तःगु थ्व मुद्दाया आन्तरिक आशय नं वास्तवय् थ्वहे खः ।

सुनारयात धाथें क्वथा मालाः बालं काः वःगु वा प्रधानं वयात धाथें हे छुवाछुतया व्यवहार याःगु मखु धइगु खँ पुष्टि हे जुइधुंकूगु दु । अथे खःसां थ्व मुद्दां यानाः सुं नं दलितयात छुवाछुतया व्यवहार याये मजिउ, थी मत्यः धकाः बालं बियातःगु क्वथां पितिने मजिउ धइगु सन्देश ला बी हे धुंकूगु दु । थ्व मुद्दाया मू आशय त्याइगु बुइगु सिबें नं सन्देश प्रवाह यायेगु खः । व सन्देश प्रवाह जुइधुंकूगु दु । उकिं थुकियात अनं नं च्वय् हानं मुद्दाय् वनाच्वन धाःसा थुकिं निगू उत्पीडित समुदाय दथुइ थप द्वन्द्व पिकया बीगु निश्चित दु ।