इपीएस आन्दोलनय् निम्ह सित

येँ (नेपालभाषा टाइम्स)- वैदेशिक रोजगारया नितिं कोरिया वनेत रोजगार अनुमति प्रणाली (ईपीएस) परीक्षा बी मखंगु खँय् विरोध यासें आन्दोलन याःपिं निम्ह प्रदर्शनकारीत प्रहरीया गोलीं कयाः सीगु दु । प्रहरीया गोलीं कयाः घाःपाः जूम्ह सुजन राउत व वीरेन्द्र शाह सीगु खः । थुकी मध्ये राउतयात गोलीं लाःगु मखुसें प्रहरीं कयेकाहःगु टियर ग्याँसं कयाः सीगु अनुमान याःगु दु ।

म्हिगः सुथंनिसें ईपीएस आवेदन फारम भरे याये मखंगु धासें पीडित ल्याय्म्हतय्सं ग्वार्कोय् च्वंगु ईपीएस कार्यालय न्ह्यःने मुनाः आन्दोलन न्ह्याकूगु खः । उत्पादनमूलक क्षेत्रया निंतिं आवेदन बी मखंगु धासें उमिसं प्रदर्शन याःगु खः ।

म्हिगः अन मुपिंसं झिंच्याम्ह बाहेक मेपिंत नं फाराम भरे याकेमाःगु माग यासें आन्दोलन याःगु खः । आन्दोलनया झ्वलय् आन्दोलनकारीतय्सं भौतिक पूर्वाधार तथा यातायात मन्त्री प्रकाश ज्वाला सरकारी गाडी समेत च्याकाबिउगु खः ।

ईपीएस कोरिया शाखां उत्पादनमूलक क्षेत्रया निंतिं आवेदन आह्वान याःगु खः । उकी थ्व स्वयां न्ह्यः सिप बिल्डिङ क्षेत्रया निंतिं आवेदन बिउपिंसं आवेदन बी दइ मखु धायेवं उकिया विरुद्ध ल्याय्म्हतय्सं नाराबाजी याःगु खः ।

थ्व विषययात कयाः सुरज पाठक सहित झिंच्याम्हेस्या उच्च अदालत यलय् मुद्दा दायर याःगु खःसा अदालतं झिंच्याम्हेसित फाराम भरे याकेत व फुक्कं प्रक्रियाय् सहभागी याकि धकाः अन्तरिम आदेश जारी याःगु दु । अदालतया अन्तरिम आदेश जारी जुइधुंकाः ईपीएस कोरिया शाखां म्हिगः फाराम भरे यायेगु नितिं कार्यालयय् सम्पर्क यायेत सुचं जारी याःगु खः ।

प्रदर्शनकारीतय्त नियन्त्रण यायेत प्रहरीं टियर ग्यास कयेकूगु खःसा वयां लिपा हवाइ फायर याःगु खः । उकिं नं स्थिति नियन्त्रणय् मवयेवं गोलीं कयेकूगु खः । प्रहरीं म्हिगः न्यय्म्ह स्वयां अप्वः प्रदर्शनकारीतय्त ज्वना यंकूगु दु ।

थ्वहे झ्वलय् गृह मन्त्रालयं घटनायात कयाः छानविन यायेत उपत्यका प्रहरी कार्यालयया डीआईजी लालमणि आचार्यया नेतृत्वय् समिति दयेकूगु दु । समितिइ यलया सहायक जिल्ला अधिकारी अमरदीप सुनुवार व राष्ट्रिय अनुसन्धानया उपअनुसन्धान निर्देशक बासु सिग्देल दुजः कथं दुथ्याकूगु दु ।

थ्वहे झ्वलय् राष्ट्रिय मानव अधिकार आयोगं म्हिगःया घटनायात कयाः थःगु ध्यानाकर्षण जूगु खँ धाःगु दु । आयोगं म्हिगः थ्व घटनाय् थःपिनि ध्यानाकर्षण जूगु खँ धासें आयोगया पुचः घटनास्थलय् वनाः छानविनया ज्या न्ह्याकुगु नं जानकारी याकूगु दु ।