ने. सं. ११४४ चौलागा नवमी -

छगूत्या करोड तूगु तिलौराकोटया प्रतिवेदन

येँ (नेपालभाषा टाइम्स)- भगवान बुद्धया राजधानी तिलौराकोटयात नं विश्व सम्पदाया धलखय् दुथ्याकेगु लागिं युनेस्कोय् लःल्हायेत नेपालं तयार याःगु प्रतिवेदन छगूया कुल खर्च करिब छगूत्या करोड तूगु खँ सीदुगु दु ।

नेपाःपाखें वंगु वालय् तिनि फ्रान्सया राजधानी पेरिसस्थित विश्व सम्पदा केन्द्रय् थ्व प्रतिवेदन सहित निवेदनपौ दर्ता याःगु खः । नेपालं निवेदन सहित दर्ता याःगु थ्व प्रतिवेदन जक प्यंगू भोलुम दु । प्यंगुलिं भोलुम छथाय् तयेबलय् करिब द्वःछि पौ (१ हजार पेज) दुगु खः । थ्व प्यंगुलिं भोलुमय् नेपाःपाखें संस्कृति मन्त्री सुदन किरातीं हस्ताक्षर यानादीगु खः ।

थ्व प्रतिवेदन तयार यायेगु लागिं नेपालं विज्ञतय्गु छगू पुचः नं गठन याःगु खः । उगु पुचःया नेतृत्व अष्ट्रेलियाया पुरातत्वविद् प्रा. डंकल मार्शलं यानादीगु खः । वय्कः युनेस्कोया लागिं थज्याःगु प्रतिवेदन तयार यायेगु ज्याया विज्ञ नं खः । वय्कलं थ्व छगू प्रतिवेदन तयार यायेत २५ हजार अमेरिकी डलर पारिश्रमिक कयादीगु खः ।

प्रतिवेदन तयार यायेगु वंगु दत्या न्ह्यवंनिसें च्वयेगु ज्या न्ह्याःगु खः । उकिया लागिं ताः ई न्ह्यवंनिसें जुयाच्वंगु उत्खनन्या लिच्वः व ऐतिहासिक पक्ष सम्बन्धी तथ्यत मुंकेगु ज्या जूगु खः । उगु ज्याय् बेलायतया दूरहाम विश्वविद्यालयया प्रा. रबिन कनिङघमं विशेष ग्वाहालि यानादीगु खः । वय्कलं वंगु तःदँ न्ह्यवंनिसें हे तिलौराकोटय् उत्खनन् यानाः नेपाःया तिलौराकोट हे गौतम बुद्धया अबु शुद्धोधनया दरवार खः धकाः पुष्टि यानादीगु खः । भगवान बुद्धया कपिलवस्तु दरवार नेपाःया तिलौराकोटय् मखु भारतया पिप्रहवाय् लाः धकाः भारतं याना वयाच्वंगु दावीयात नं वय्कःया उत्खननं फय्गं साबित याना बिउगु खः ।