थःथः ल्वानाः गैंडा सीपिं अप्वल

येँ – छपु न्यकू दुम्ह गैंडाया लागिं नेपाःया विश्वय् हे नांजाः । गैंडा बचे यायेमाः धकाः नेपालं चोरी शिकारी पनेगु लागिं यक्व हे मेहनत याःगु दु । नेपाःया थ्वहे अथक कुतःया कारणं यानाः नेपालय् गैंडाया चोरी शिकार शून्य अवस्थाय् थ्यनेधुंकूगु खः । तर अथे खयां नं चितवनय् गैंडा सीगु क्रम धाःसा दिउगु मदुनि ।

तर थौंकन्हय् गैंडा सीगुया कारण धाःसा चोरी शिकारी मखु । गैंडात थवंथः हे ल्वानाः सीगु क्रम अप्वयाच्वंगु खः । थगुने दछिया दुने गैंडात थवंथः ल्वानाः व मेगु थीथी कथंया प्राकृतिक कारणं यानाः २६ म्ह गैंडा सीगु खः । थ्व दँय् धाःसा वंगु झिलाया दुने हे २३ म्ह गैडा सीधुंकूगु दु । थ्व फुक्क हे प्राकृतिक कारणं यानाः सीगु खः ।

चितवनया चिकिचाकूगु थासय् गैंडाया संख्या अप्वयाः उपिं थवंथः ल्वानाः सीगु खँ धाःगु दु । अथे हे तःभुखाय् लिपा मेमेगु लागाय् च्वंपिं गैंडात नं उगु लागाय् लाः वःगु जुयाः म्हमसिउपिं गैंडातय् दथुइ ल्वापु जुइगु क्रम अप्वयाच्वंगु दु । गैंडातय् औसत आयु ४० दँ धाइ । तर थौंकन्हय् अन १५–१६ दँ जक दुपिं गैंडात अप्वः सिनाच्वंगु दु ।

गुलिं गैंडात खुसि छी मफयाः सीगु दुसा गुलिं थः च्वनाच्वंगु थासं पिहां वये मफयाः नं सीगु दु । थुकी मध्ये नं ४१ म्ह गैंडा सीगुया कारण तकं आः तक पत्ता लगे मजूनि । गैंडातय्त छुं तःधंगु ल्वय् जूगु नं खने मदुनिगुलिं उमिगु मृत्यु छु कारणं जुल धकाः धाये फयाच्वंगु मदुनि । गैंडा सीगुया प्राकृतिक कारण पत्ता लगे यायेत कुतः जुयाच्वंगु खँ धाःगु दु ।

 

सम्बन्धित बुखँ

LEAVE YOUR COMMENTS