दाहालपाखें ‘दौरा सुरुवाः’ पुनाः शपथ ग्रहण

येँ (नेपालभाषा टाइम्स)÷नव नियुक्त प्रधानमन्त्री पुष्पकमल दाहालं च्याम्ह दुजः दुगु मन्त्रिमण्डल गठन यानादीगु दु । म्हिगः शीतल निवासय् राष्ट्रपति विद्यादेवी भण्डारीं प्रधानमन्त्री दाहाल, स्वम्ह उपप्रधानमन्त्री व प्यम्ह मन्त्रीतय्त पद व गोपनीयताया शपथ ग्रहण याकादीगु खः ।

मन्त्रिपरिषद्य् एमालेपाखें बिष्णु पौडेल, माओवादी केन्द्रपाखें नारायणकाजी श्रेष्ठ व राष्ट्रिय स्वतन्त्र पार्टीपाखें रवि लामिछाने उपप्रधानमन्त्री जूगु दु । एमालेया उपाध्यक्ष पौडेलयात अर्थ मन्त्रालय, माओवादी केन्द्रया वरिष्ठ उपाध्यक्ष श्रेष्ठयात भौतिक पूर्वाधार व लामिछानेयात गृह मन्त्रालयया जिम्मेवारी बिउगु दु ।

मन्त्री पदय् एमालेया दामोदर भण्डारी, ज्वालाकुमारी साह व राजेन्द्र राईपिं च्वनादीगु । उकथं हे जनमत पार्टीया उपाध्यक्ष अब्दुल खाँ नं मन्त्री जुयादीगु दु । वय्कःपिनि मन्त्रालय धाःसा तोके मयाःनि । म्हिगः न्हापांगु चरणया मन्त्रिपरिषद् गठन जूगु खःसा आः याकनं हे थ्व मन्त्रिपरिषद विस्तार जुइगु खँ धाःगु दु ।

सरकारयात समर्थन याःसां नं राप्रपा व नागरिक उन्मुक्ति पार्टीं मन्त्रिमण्डलय् मवनेगु निर्णय याःगु दु । थुकी जसपाया मन्त्री धाःसा दुमथ्याःनि ।

मन्त्रिपरिषद् गठन स्वयां न्ह्यः प्रधानमन्त्री दाहालं शितल निवासय् ग्वसाः ग्वःगु शपथ गहण ज्याझ्वलय् राष्ट्रपति भण्डारीपाखे शपथ ग्रहण यानादीगु खः । शपथ ग्रहण ज्याझ्वलय् निवर्तमान प्रधानमन्त्री शेरबहादुर देउवा, पुलांम्ह प्रधानमन्त्री केपी ओली शर्मा, माधव नेपाल, डा. बाबुराम भट्टराईपिंसं ब्वति कयादीगु खः ।

म्हिगःया शपथ ग्रहण ज्याझ्वलय् प्रधानमन्त्री दाहाल ‘दौरा सुरुवाः’ पुनाः उपस्थित जुयादीगु खः । थ्व स्वयां न्ह्यः वय्कलं ‘दौरा सुरुवाः’ यात राज्यं लादे यानातःगु छगू जाति विशेषया वसः धासें उकियात बहिष्कार याना वयादीगु खः ।

शपथ ग्रहण ज्याझ्वः क्वचाये न्ह्यः हे निवर्तमान प्रधानमन्त्री शेरबहादुर देउवा धाःसा पिहां वंगु खः । न्हापाया प्रचलन कथं न्हूम्ह प्रधानमन्त्रीयात भिन्तुना बियाः व ज्याझ्वः क्वचायेकाः जक निवर्तमान प्रधानमन्त्री पिहां वनीगु खः । तर देउवां म्हिगः उगु प्रचलनयात तकं पालना यानामदी । थ्व स्वयां न्ह्यः नं न्हूम्ह प्रधानमन्त्रीया शपथ ग्रहण ज्याझ्वलय् निवर्तमान प्रधानमन्त्री मवंगु उदाहरण दु धासें शुरुइ वय्कलं समारोहय् हे वयेत अस्वीकार यानादीगु खः ।