
येँ – सनसिटी च्वनीपिं कोरोना भाइरस संक्रमितपिनि सम्पर्कय् वःगुलिं र्यापिड टेस्ट याःपिं येँ महानगरपालिका ५ वडाया जनप्रतिनिधितय् टेस्ट रिपोर्ट नेगेटिभ वःगु दु । सनसिटीइ च्वंपिं संक्रमितत बेलायतं नेपाः वयेधुंकाः वंगु चैत ९ गते ५ नं. वडा कार्यालयय् वयाः थः म्ह्याय्या जन्मदर्ता याकःवःगु खः । उगु इलय् उमिसं वडाध्यक्षलिसे च्वनाः च्या नं त्वना वंगु जुयाच्वन ।
म्हीग उमिके कोरोनाया संक्रमण खनेदयेवं उपिं लिसे सम्पर्कय् वःम्ह वडाध्यक्ष रमेश डंगोल लिसें कर्मचारी, मेपिं जनप्रतिनिधिपिं व राहत ज्याय् संलग्न ३९ म्हेसिया र्यापिड टेस्ट याकूगु खः ।
येँ महानगरपालिकाया मेयर विद्या सुन्दर शाक्यं थौं र्यापिड टेस्ट याकूपिं सकसियां रिपोर्ट नेगेटिभ वःगु खँ धयादीगु दु ।
चैत ९ गते म्ह्याय्या जन्म दर्ता यायेगु निंतिं कलाः–भाःत निम्हं वडा ज्याकुथिइ वःगु व उमित चिया त्वंका छ्वयागु खँ वडा अध्यक्ष रमेश डंगोलं धयादीगु दु । वय्कःलिसे सम्पर्कय् वःम्ह वडाअध्यक्ष लिसें कर्मचारीत लिसे राहत ज्याय् वनाच्वंपिं सम्पर्कय् वःगुलिं राहतकर्मीतय् नं ¥यापिड टेस्ट याकूगु खः ।
राहत ज्याय् हे नापनापं जुयाच्वंम्ह येँ क्षेत्र नं. ५ या प्रदेश सांसद नारायण सिलवालया नं र्यापिड टेस्ट जूगु खः ।
मेखे सनसिटीया र्यापिड टेस्टय् पोजेटिभ रिपोर्ट वःम्ह भौम्हेसिया निक्वःगु पिसिआर टेस्टया रिपोर्ट नं नेगेटिभ वःगु खँ धाःगु दु ।
LEAVE YOUR COMMENTS