स्कुलय् स्वीकृत सफू जक ब्वंकेत निर्देशन

येँ (नेपालभाषा टाइम्स)- येँ महानगर दुनेया छुं विद्यालयतय्सं स्वीकृत मजूगु पाठ्यक्रम व पाठ्यपुस्तक ब्वंकाच्वंगु व अज्याःगु पाठ्यपुस्तक न्यायेत विद्यार्थी व अभिभावकतय्त बाध्य समेत यानाच्वंगु लूगु दु ।

येँ महानगरपालिकां विद्यार्थी व अभिभावकपाखें थःथाय् अज्याःगु आपालं गुनासो वःगु दु धासें शिक्षा विभागपाखें थःपिनिगु गम्भीर ध्यानाकर्षण जूगु व स्वीकृत मजूगु पाठ्यक्रम व पाठ्यपुस्तक मब्वंकेत विद्यालयतय्त सचेत नं याकूगु दु ।

महानगरया शिक्षा विभाग प्रमुख सीताराम कोइरालां थीथी विद्यालययात पौ च्वयाः नेपाल सरकारं स्वीकृत यानातःगु व पाठ्यक्रम विकास केन्द्र सानो थिमिइ सूचीकृत जूगु पाठ्यपुस्तक जक (अंग्रेजी व्याकरण व अंग्रेजी शब्दकोश बाहेक) पठनपाठन यायेगु व्यवस्था या धकाः सूचित याकूगु खः । विभागं छ्वःगु पतिइ गुगुं नं विद्यालयं थ्व सुचं अःखः पाठ्यक्रम व पाठ्यपुस्तक लागू याःगु लुत धाःसा शिक्षा ऐन, २०७५ (संशोधनसहित) कथं माःगु कारबाही यायेगु ख्याच्वः नं बियातःगु दु ।

शिक्षा ऐन, २०२८ या दफा ८ व शिक्षा नियमावली, २०५९ या नियम ३१ बमोजिम विद्यालयं सरकारं स्वीकृत याःगु पाठ्यक्रम व पाठ्यपुस्तक अनिवार्य रुपय् लागू यायेमाःगु व उगु हे ऐनया दफा १२ या उपदफा (७) य् संस्थागत विद्यालयं नेपाल सरकारं लागू याःगु पाठ्यक्रम व पाठ्यपुस्तक अनिवार्य रुपं लागू यायेमाःगु व्यवस्था दु । मेगु ग्वाहालि जुइगु पाठ्यपुस्तक ब्वंकेमाःगु खनेदत धाःसा राष्ट्रिय पाठ्यक्रम विकास तथा मूल्यांकन परिषदया स्वीकृत कायेमाःगु प्रावधान दुगु खँ नं महानगरं लूमंकूगु दु ।