प्रसाईंया आन्दोलन छन्हु लिपा हे शिथिल

येँ (नेपालभाषा टाइम्स)- मेडिकल व्यवसायी दुर्गा प्रसाईया आह्वानय् जुयाच्वंगु आन्दोलनं यानाः यातायात प्रभावित जूसां म्हिगः धाःसा गनं छुं कथंया ल्वापु मजुल । विहीवाःया ज्याझ्वलय् दुर्गा प्रसाईं नेतातय्त लाक्वपाक्व ब्वः बियाः नेतात गन नापलात अन हे ज्वनाः दाया बिउसां जिउ धकाः बिउगु अभिव्यक्तिया कारणं म्हिगः येँया सिडिओ ज्याकू नं विशेष सतर्क जूगु खः ।

अथे हे वय्कलं थीथी बैंकतय्त ब्वः बियाः अनया सिईओतय्त कारवाही यायेगु धकाः न्ववाःगु अभिव्यक्तिं यानाः बैंकत नं त्रसित जुयाच्वंगु दु ।

थ्वहे झ्वलय् म्हिगः प्रशासनं दुर्गा प्रसाईंन ज्याझ्वः यायेगु धकाः प्रस्ताव यानातःगु तिनकुनेय् छुं नं ज्याझ्वः याके मबिल । अन ज्याझ्वः दु धकाः वःपिं मनूतय्त नं धमाधम ज्वना यंकल । अथेहे दुर्गा प्रसाईंया छेँय् नं प्रहरी पाः तयाः कडा सुरक्षा बिल । थःगु छेँ न्ह्यःने यक्व प्रहरी पाः तःगुलिं थःत सरकारं नजरबन्द तल धकाः प्रसाईं व वय्कःया समर्थकतय्सं दावी याःसां येँया सिडिओ जितेन्द्र बस्नेतं धाःसा प्रसाईंयात नजरबन्दय् मतयागु धकाः दावी यानादीगु दु । प्रसाईंनं म्हीगया ज्याझ्वलय् लाक्वपाक्व न्ववाःगु जुयाः वय्कःया हे सुरक्षाया लागिं छेँया पिने सुरक्षाकर्मी तैनाथ यानागु खः धासें थ्व नजरबन्द मखु धाःगु दु ।

मेखे प्रसाईंया छुं समर्थकतय्सं म्हिगः सर्वोच्च अदालत वनाः प्रसाईंयात गैरकानुनी रुपं नजरबन्दय् तल धासें रिट दायर याःगु दु ।

प्रसाईं धाःसा थःत नजरबन्दय् तल धाःसां थःगु हे छेँ दुने पत्रकारत सःताः पत्रकार सम्मेलन यानादीगु खः । छेँय् वःपिं पत्रकारतय्त वय्कलं थःत छेँ दुने कुनाः लोकतन्त्र बमलाइगु दावी यानादिल । लिसें वय्कलं थः व्यवस्थाया विरोधी मखु, व्यवस्था चले याइपिनि ज्याखँया जक विरोधी खः धयां नं मत्वःतूगु खँ नं धयादिल ।

प्रसाईं थःत प्रशासनं छेँय् हे कुनाः नजरबन्दय् तःगु दावी याःसां छेँनं पिहां वनेगु कुतः धाःसा मयाःगु खँ सीदुगु दु । प्रशासनं वय्कःयात छेँनं पिहां वये दइ मखु धकाः छुं कथंया पौ वा ख्याच्वः मबिउगु खँ धाःगु दु ।

प्रसाईं थम्हं आः पुलांम्ह जुजु ज्ञानेन्द्रयात नारायणहिति दरवारय् स्थापना यायेधुंकाः जक आन्दोलन दिकेगु धकाः नं सार्वजनिक अभिव्यक्ति बीगु यानाच्वंगु दु ।
प्रसाईंयात नजरबन्द याःगु खँयात कयाः रास्वपाया अध्यक्ष रवि लामिछानें नं वाक् स्वतन्त्रता हनन् याये दइ मखु धकाः अभिव्यक्ति बियादीगु दु ।

राष्ट्र, राष्ट्रियता, धर्म, नागरिक बचाउ अभियान धकाः प्रसाईनं न्ह्याकूगु थ्व आन्दोलनयात जुजुवादी पार्टी राप्रपां धाःसा खुले जुयाः समर्थन याःगु मदुनि । राप्रपाया अध्यक्ष राजेन्द्र लिङदेनं बैंकय् लोन कयाः मपुसे च्वनाच्वंम्ह मनूयात आन्दोलनया नामय् थम्हं समर्थन याये फइ मखु धकाः सार्वजनिक अभिव्यक्ति बियादीगु दुसा सह अध्यक्ष रविन्द्र मिश्रं धाःसा आः राजनीतिक दलतय्सं २०४६ सालया संविधान लागू यानाः थ्व आन्दोलनयात निकास बीमाः धकाः न्ववायेगु यानाच्वंगु दु । आन्दोलनयात राप्रपां प्रत्यक्ष समर्थन मयाःसां म्हीग बल्खुइ जूगु आन्दोलनय् धाःसा राप्रपाया गुलिखे कार्यकर्तातय्सं ब्वति काः वयाच्वंगु लूगु खः ।

महेश बस्नेतया कार्यकर्ता मौन
दुर्गा प्रसाईंया समर्थकतय्सं म्हिगः नं येँय् सामान्य प्रदर्शन याःसां उकिया विरुद्ध मैदानय् कुहां वःम्ह एमाले समर्थित युवा संघया नेता महेश बस्नेतया कार्यकर्तात धाःसा म्हिगः मौन हे च्वन । बस्नेत पक्षं म्हिगः गनं नं प्रदर्शन नं मयात । बस्नेत पक्षया प्रदर्शन मदुगुलिं म्हिगःया राजधानीया अवस्था सामान्य खने दत । म्हिगः यातायात नं भचा चले जुलसा म्हीग बन्द जूगु स्कुल कलेजत नं म्हिगः खुले जुल । म्हिगः नं भिडन्त वा तनावया अवस्था नं मजुल । बस्नेत पक्षं आः गबले ज्याझ्वः याइ धइगु धाःसा निश्चित मजूनि ।