प्रा. माणिकलालया लुमन्तिइ ज्याझ्वः

येँ- वरिष्ठ समालोचक, वामपन्थी चिन्तक व विश्लेषक प्रा. माणिकलाल श्रेष्ठया दकिलाया पुण्य तिथिइ लुमन्ति ज्याझ्वः जुल । प्रा. माणिकलाल श्रेष्ठया छेँजःपिंसं ग्वसाः ग्वयादीगु ज्याझ्वः प्रा. सुन्दरकृष्ण जोशीया सभापतित्वय् जूगु खः ।

मदुम्ह प्रा. माणिकलालया किपाय् स्वां देछानाः छगू मिनेट मौन धारण यासे न्ह्याःगु ज्याझ्वय् नेवाः न्ह्यलुवा मल्ल के. सुन्दरं मदुम्ह माणिकलाल छम्ह बहुआयामिक अथाह सागर जूगु खँ कनादिल । भाषा, जातीय अधिकार जक मखसे साहित्य, राजनीति, पत्रकारिता, दर्शन, विज्ञान, कानूनया क्षेत्रय् तकं दखल दुम्ह वय्कः पे्ररक पुरुष जूगु विचाः तयादिल । वय्कलं प्रा. माणिकलाल नेपाःया वामपन्थी आन्दोनलय् पार्टीया निर्णय विरुद्ध भाषा, जातिया पक्षधर सशक्त रुपं दनादीम्ह छम्ह जक वामपन्थी नेता खः धयादिल ।

पूर्व राजदूतलिसें परराष्ट्रविद् हिरण्यलाल श्रेष्ठं गोरखापत्रं थौंकन्हय् नयाँ नेपालया नामं थीथी भासं पिथना वनाच्वंगुया लिउने प्रा. माणिकलालया तःधंगु योगदान दुगु खँ न्ह्यथनादिसें वय्कः नेवाः भाय् जक मखसे अंगे्रजी व नेपाली भाषाय् नं उलि हे पोख्तम्ह व्यक्ति खः धयादिल ।

नेपाल कम्युनिष्ट पार्टी (क्रान्तिकारी माओवादी)या अध्यक्ष मोहन वैद्यं प्रा. माणिकलाल नेपाःया कम्युनिष्ट आन्दोलनय् हे छम्ह महत्पूर्ण भूमिका दुम्ह व्यक्ति खः धासें वय्कलं कम्युनिष्ट पार्टीया एकताया निंतिं नं तसकं कुतः यानादीगु खँ चर्चा यानादिल ।

नेवाः न्ह्यलुवा डा. महेशमान श्रेष्ठं थम्हं छक्वः ब्वंगु सफू न्ह्याबलेंया निंतिं लुमंका तयेगु क्षमता दुम्ह प्रा. माणिकलालयात निक्वःतक राजदूतया निंतिं प्रस्ताव वःगु व राजदूत जुइत कम्युनिष्ट पार्टीया सदस्यता कायेमाःगु कारणं राजदूतया प्रस्ताव हे अस्वीकार याःगु खँ न्ह्यथनादिल । वय्कलं तत्कालीन जुजु वीरेन्द्रं थःगु दुःख प्वंकेमाःसा अतिकं विश्वास यानातःगु व्यक्तित्व नं माणिकलाल खः धयादिल ।

पुलांम्ह सभामुख दमननाथ ढुंगानां माणिकलाल विचारय् जक मखु कर्मय् नं उलि हे तःमिम्ह व्यक्तित्व खः धासें नेपाः धइगु गथे जुइमाः, थनया राजनीति गथे जुइमाः, नेपाःया कम्युनिष्ट आन्दोलन गुकथं न्ह्याकेमाः, प्रजातन्त्र गथे जुइमाः नापं छु याःसा नेपालय् एकता जुइ धइगु थूम्ह छम्हयां छम्ह जक व्यक्ति जूगु विचाः तयादिल ।

ज्याझ्वलय् संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, सांसद पे्रम सुवाल, वरिष्ठ अधिवक्ता कृष्णप्रसाद भण्डारी, मदुम्ह प्रा. माणिकलालया कायपिं डा. मलखलाल व डा. सितुलाल श्रेष्ठं नं नुगःखँ तयादीगु खः ।