संसदीय समितिया ल्याः अप्वल

आः समितिया सभापति जुइत पार्टीतय् हानथाप

येँ – पदया इच्छा याइपिं अप्वः दयाः संसदय् सीमित जक विषयगत समिति दयेकेगु धकाः जूगु कुतः विफल जूगु दु । सदनय् फुक्कं यानाः न्हय्गू जक समिति दयेकेगु धकाः जूगु कुतः अन्ततः विफल जुयाः प्रस्तावित स्वयां निदुगं अप्वः १६ गू समिति गठन याइगु जूगु दु ।

थीथी पार्टीया नेता व सांसदतय् दथुइ ताःहाकः रस्साकस्सी जुजुं अन्तिमय् १६ गू समिति गठन यायेगु सहमति जूगु खः । थुकी प्रतिनिधिसभाया १० गू, राष्ट्रिय सभाया प्यंगू व संयुक्त सभाया निगू समिति दुथ्याः । न्हापा यक्व समिति दुसां बांलाक ज्या मजूगु व आः थीथी प्रदेशय् समेत थीथी समिति दइगु जूगुलिं केन्द्रय् कम जक समिति दयेकूसां गाः धकाः संसद सचिवालयं मुक्कं न्हय्गू जक समिति दयेकेगु प्रस्ताव याःगु खः ।

तर पार्टी व सांसदतय्सं उलि समिति दयां मगाः धासें ल्याः बढे यानाः १६ गू थ्यंकूगु खः । सांसदतय्सं याःगु थ्व सहमतियात पार्टीया नेतातय्सं नं स्वीकृति बिउगु खः । खास यानाः मन्त्री जुइ मखंपिं नेतातय्त व्यवस्थापन यायेगु लागिं अज्याःगु समितिया सभापति दयेकीगु चलन दु । समितिया सभापतियात राज्य मन्त्री सरहया सुविधा दइ ।

आः पार्टीतय् दथुइ समितिया सभापति जुइगु खँय् कचवं पिहां वये फुगु खँ सूत्रं धाःगु दु । हरेक पार्टीं सभापति थःपिंत दयेमाः धकाः दावी याइगुली थुकी विवाद जुइगु खः ।थ्वहे झ्वलय् आः कुल सभापति मध्ये मिसापिं नं ३३ प्रतिशत सभापति जुइ हे दयेमाःगु माग नं जुया वःगु दु । नियमावलीइ थ्वहे खँ च्वयातःगुलिं मिसापिं सांसदतय्सं नं थुकी दावी याइगु जुयाच्वंगु दु ।

आः विषयगत समिति अप्वः ल्याखय् गठन जूसां उकी च्वनीपिं सांसदतय् ल्याः धाःसा कम यायेगु तयारी जुयाच्वंगु दु । न्हापा छगू समितिइ ७०–७५ म्ह दुजः दइगु खःसा आः ३० म्ह जक दयेकेत्यंगु दु ।

मन्त्रालय २१, समिति १६

सरकारं राज्यया धुकू कम जक खर्च यायेगु ल्याखं मन्त्रालयया ल्याः कम याःसां संसदीय समितितय् ल्याः धाःसा कम याये मफुत । न्हापा ३१ गू दुगु मन्त्रालयया ल्याः क्वपालाः थौंकन्हय् २१ गू दयेकूगु दु । न्हापा ३१ गू मन्त्रालय दुबलय् संसदय् थीथी समितितय् ल्याः १२ गू जक दुगु खः ।

आः मन्त्रालयया ल्याः कम यानाः २१ जक दयेकूबलय् धाःसा समितितय् ल्याः बढे जुयाः १६ गू थ्यंगु दु । संसदय् विषयगत समितित खास यानाः मन्त्रालयलिसे हे तालमेल यानाः गठन याइगु खः । आः मन्त्रालय हे कम जुइधुंकाः संसदीय समितिया ल्याः ठपे याःगु धइगु ज्या यायेगु लागिं स्वयां नं सुविधा उपभोग यायेत जक खः धकाः नं सूत्रं धाःगु दु ।