पद्मरत्नया नामं सिरपाः नीस्वनीगु

येँ – नेवाः न्ह्यलुवा पद्मरत्न तुलाधरया नामं सरकारं सिरपाः नीस्वनीगु जूगु दु । संस्कृति मन्त्रालयपाखें भाजु तुलाधरया नामं सिरपाः नीस्वनेगु बचं संस्कृति मन्त्री योगेश भट्टराईं बियादीगु खः । पद्मरत्न लुमन्ति गुथिया प्रतिनिधित लिसे खँ ल्हासें मन्त्री भट्टराईनं थ्व खँ धयादीगु दु ।

गुथिया नायः डा. केशवमान शाक्यया नेतृत्वय् वंगु प्रतिनिधि मण्डलं मन्त्री भट्टराईयात छगू ज्ञापनपौ बिसें तुलाधरया हुलाक टिकट पिकायेमाःगु, वय्कःया किपा तयाः पाँय्म्वः पिथनेमाःगु, तुलाधरया बारे पाठ्यसफुली ब्वंके माःगु माग याःगु खः । मन्त्री भट्टराईनं हुलाक टिकट पिथनेगु लागिं सञ्चार मन्त्रालययात इनाप यायेगु खँ नं कनादिल ।

मन्त्रीयात ज्ञापनपौ बीगु लागिं गुथिया न्वकु सुम्निमा तुलाधर, छ्यांज्ये नरेशवीर शाक्य लिसें संघीय सांसद कृष्णगोपाल श्रेष्ठ, प्रदेश सांसदपिं डा. अजयक्रान्ति शाक्य, राजेश शाक्य व गुथिया मेपिं पदाधिकारीत झाःगु खः । उगु इलय् मन्त्री भट्टराईनं मदुम्ह तुलाधरलिसेया थःगु पुलांगु लुमन्ति नं अन कनादीगु दु ।

२०४३ सालया चुनावय् थःपिं नं सहभागी जुयागु लिसें भाजु तुलाधरलिसें तुं थः नं छुं ई नापं जेल लाःगु प्रशंग वय्कलं अन लुमंकादीगु खः ।
नेपालय् मानव अधिकार आन्दोलनया शुरुवात यायेगु लिसें नेपाल संवत्या न्हूदँ आन्दोलन न्ह्याकेगु ज्याय् भाजु तुलाधरं यानादीगु योगदानयात कयाः नं अन चर्चा जूगु खः ।

नेपालभाषा टाइम्स

च्वमिया मेमेगु

• तोखाया धर्म संस्कृति सम्बन्धी सफू
• यःसिं हनुमानध्वाखा थ्यन
• देय दबूया स्वीक्वःगु बुसादँ हन
• आः लाइसेन्सया पलेसा क्युआर कोर्ड दुगु रसिद
• माओवादीपाखें नं खुसि मापदण्डया विरोध