ने. सं. ११४४ कौलाथ्व पारू - नःलास्वनेगु

एनआरएन सम्मेलनय् लिच्वः अस्वीकार

येँ(नेपालभाषा टाइम्स)- गैर आवासीय नेपाली संघ (एनआरएनए)या अध्यक्षया निम्ह प्रत्याशीं मत परिणामयात अस्वीकार याःगु दु । थन न्ह्यानाच्वंगु संघया झिंछक्वःगु महाधिवेशनया झ्वलय् न्हूगु नेतृत्व ल्ययेगु निंतिं अनलाइन भोटिङ माध्यमं जूगु निर्वाचनया परिणामयात अध्यक्षया निम्ह प्रत्याशीं अस्वीकार याःगु खः ।

अध्यक्षया प्रत्याशी महेशकुमार श्रेष्ठ व आरके शर्मां अनलाइन भोटिङ सिस्टम हे कब्जा याःगथु धासें मत परिणाम अस्वीकार याःगु खः। निम्हं प्रत्याशीं अस्टे«लियाय् च्वंगु कम्पनी भेरोपाखें ‘फेस भेरिफिकेसन’ पद्दति प्रयोग यानाः अनलाइन मतदान प्रणाली कब्जा याःगु धासें मत परिणाम अस्वीकार यायेगु घोषणा याःगु खः । ्

वंगु असोज ३० निसे शुरु जूगु संघया महाधिवेशनं न्हूगु नेतृत्व ल्ययेगु निंतिं विहीवाः मतदान प्रक्रिया न्ह्याःगु खः । महाधिवेशनय् उपस्थित जूपिं नापं अनलानइपाखें भोटिङ यायेगु व्यवस्था याःगु खः । मतदान लिपा अध्यक्षय् बद्री केसीयात विजयी घोषणा यायेवं थुकियात कयाः विरोध जुयाच्वंगु दु ।

अध्यक्षया प्रत्याशीद्वय श्रेष्ट व शर्मां शुक्रवाः सुथय् छगू मंकाः विज्ञप्ती जारी यासें मत परिणाम अविश्वसनीय व मतदान प्रक्रिया हे त्रुटीपूर्ण जूगु धासें नियोजित रुपं न्हापा हे सेटिङ यानाः अक्टोबर २० कुन्हु चान्हसिया इलय् सार्वजनिक याःगु कथित मत परिणामया घोषणा थःपिंत गुगुं हालतय् नं मान्य मजू धाःगु दु । उपाध्यक्षया उम्मेदवार डा. केशव पौडेलया मत शुन्य क्यनाःगु खः । पौडेलया मत शुन्य क्यनातःगु खँय् आशंका यासें श्रेष्ठ व शर्मां अनलाइन भोटिङ प्रणाली ह्याक याःगु द्वपं बिया वयाच्वंगु दु ।

निम्हेसिनं नं मत परिणाम स्वीकार याये फइगु गुगुं नं आधार मदु धासें अनलाइन भोटिङ प्रणालीया व्यवस्थापन याःगु कम्पनी भेरोलिसे मास्टर कपी माग यानागु नं इमिसं धाःगु दु ।