‘आः क्याबिनेट निर्णय नं नेवाःभासं’

येँ (नेपालभाषा टाइम्स)÷बागमती प्रदेशय् नेपालभाषा व तामाङ भाषायात नं सरकारी ज्याखँया भाषाया मान्यता बिउगु लसताय् म्हिगः बागमती प्रदेशया मुख्यमन्त्री शालिकराम जम्मरकट्टेल लिसें प्रदेशसभाया सभामुख भूवन पाठकयात हनेगु ज्या जुल ।

थनया नेपाः ब्यांक्वेटय् नेवाः देय् दबू व थीथी नेवाः खलः पुचःया मंकाः ग्वसालय् वय्कःपिंत बेतालिं चिकाः हनेगु व सुभाय्पौ देछायेगु ज्या जूगु खः ।

ज्याझ्वलय् न्ववासें मुख्यमन्त्री जम्करकट्टेलं संघीय व्यवस्थायात बल्लाकेगु लागिं नं थःपिंसं थ्व विधेयक पारित यानागु खः, आः प्रदेशया मन्त्रि– परिषद् बैठक च्वनीबलय् अनया माइन्युट तकं नेपालभाषा व तामाङ भासं च्वयेमाः धयादिल । थ्व विधेयक आः प्रमाणीकरण यायेत प्रदेश प्रमुखयाथाय् छ्वये मानिगु व अनं पारित जुल कि राजपत्रय् प्रकाशित जुइगु खँ वय्कलं कनादिल । वयां लिपा थुकियात पूर्ण रुपं लागू याकेत खुलाया ई मानि धासें उगु इलय् थःपिंत सकल भाषिक समुदायं ग्वाहालि याये मानिगु खँ कनादिल ।

थःपिंत याःगु थ्व हनापाखें अझ ज्या यायेत उर्जा प्राप्त जूगु दु धासें वय्कलं धयादिल, ‘जि मनू ब्रम्हू खःसां पहिचानवादी खः । जिं ला थ्व प्रदेशया नां तकं बागमती मखु नेवाः–ताम्सालिङ तयेमाः धकाः लबिङ यानागु खः । तर याये मफुत ।’

ज्याझ्वलय् प्रदेशसभाया सभामुख भूवन पाठकं प्रदेशसभापाखें सकस्यां लागिं दसु जुइक ज्या याःगु दु धयादिल । नेवाः न्ह्यलुवा मल्ल के. सुन्दरं आः विधेयक पारित जुइधुंकाः आः सरकारं नेपालभाषा व तामाङ भाषां ब्वंकीगु विश्वविद्यालय, प्रतिष्ठान आदि नं चायेका वनेमाःगु खँ कनादिल । वय्कलं थ्व छगू नेवाः व तामाङ समुदायया लागिं ऐतिहासिक न्हि खः धासें सकसितं सुभाय् देछानादिल । नेपालभाषा मंकाः खलःया नायः लिसें जनकवि दुर्गालाल श्रेष्ठं देशय् न्हूम्ह सुद्र्यः लूगु दु धयादिल ।

नेवाः देय् दबूया कार्यवाहक नायः चन्द्रलाल जोशीया सभापतित्वय् जूगु उगु ज्याझ्वलय् जाति, भाषा आन्दोलनय् सक्रिय आपालं न्ह्यलुवा व कार्यकर्तातय् उपस्थिति दुगु खः ।