प्रदेश नं. ३ या बैठक क्वचाल

येँ– प्रदेश नं. ३ या थौं च्वंगु न्हापांगु बैठक क्वचाःगु दु । सरकारं क्वःछिनातःगु ३ नं. प्रदेशया अस्थायी मुकाम मकवानपुरया हेटौंडास्थित क्षेत्रीय शिक्षा निर्देशनालयय् च्वंगु न्हापांगु बैठक ज्याथम्ह सांसदया ल्याखं ७२ दँ दुम्ह डोरमणि पौडेलं प्रदेश प्रमुख अनुराधा कोइराला प्रदेशसभाया बैठक आह्वान यानादीगु पत्र ब्वनाः न्यंकादीगु खः ।
वयां लिपा बैठकं प्रदेशसभा कार्यसंचालन सम्बन्धी नियमावली मदयेकूतले प्रदेश कार्य संचालन अन्तरिम कार्यविधि पारित याःगु खः । अथे हे सभामुख व उपसभामुखया निर्वाचन मजूतलेया निंतिं कार्यसंचालनया निंतिं रामेश्वर फुयाँल, घनश्याम दाहाल, गीता वाग्ले व शोभा शाक्य दुथ्याःगु छगू समिति नं गठन याःगु दु ।
संविधानकथं देय् संघीय संरचना वने धुंकाः न्हय्गू प्रदेश मध्ये दकलय् न्हापां च्वंगु ३ नं. प्रदेशया थौया बैठकय् थीथी दलया प्रतिनिधिपिंसं संबोधन यानादीगु खः । बैठकय् नेकपा (एमाले)या उपाध्यक्ष अष्टलक्ष्मी शाक्य, नेकपा (माओवादी केन्द्र)या शालिकराम जम्कट्टेल, नेपाली कांग्रेसया इन्द्र बानियाँ, विवेकशील साझा पार्टीया रमेश पौडेल, नेमकिपाया सुरेन्द्रराज गोसाई, राप्रपा प्रजातान्त्रिकया रिना गुरुङ, राप्रपाया रिता माझी, नयाँ शक्तिया प्रेम तामाङपिंसं संबोधन यानादीगु खः ।
प्रदेशसभाया मेगु बैठक थ्व वइगु माघ २७ गते च्वनीगु जूगु दु । उकुन्हु प्रदेशसभाया सभामुखया निर्वाचन जुइगु थौंया बैठकया सभामुख जुयादीम्ह ज्येष्ठ सदस्य पौडेलं कनादीगु दु । अथे हे माघ २८ गते उपसभामुखया निर्वाचन जुइगु सम्भावना दुगु नं वय्कलं धयादीगु दु ।