कांग्रेस तःमुँज्याय् विरोधी नेतातय् दथुइ थवंथवय् ध्याचू

येँ- नेपाली कांग्रेसया तःमुँज्याय् थीथी पार्टीया नेतातय्सं सम्बोधन यानादीगु खः । सम्बोधनया झ्वलय् पुलांम्ह प्रधानमन्त्री लिसें एमालेया अध्यक्ष केपी शर्मा ओलीं गठबन्धनय् दुथ्याःगु दलतय्त कयाः टिप्पणी यासें धयादिल, ‘गुम्ह गुम्हेसितं कांग्रेसया पतिं ज्वने मदइगु खः ला धइगु चिन्ता दु । राष्ट्रियता, लोकतन्त्र, विकास, सुशासन, सामाजिक न्यायया विषयय् सहकार्य यायेत जिपिं तयार दु ।’

उकथं हे माओवादी केन्द्रया अध्यक्ष पुष्पकमल दाहालं राजनीतिक दलतय् दथुइ एकता व सहकार्य जुइमाःगु खँ धयादिल । वय्कलं राजनीतिक दल दथुइ समझदारी कायम यानाः सुशासन व विकासया लँपुइ न्ह्याः वनेमाःगु बिचाः प्वंकादीगु खः ।

अध्यक्ष दाहालं कांग्रेसया छुं नेतातय्सं कांग्रेस याकःचा हे न्ह्याः वनेमाः धायेगु यानाच्वगु दु धासें धयादिल, ‘याकःचा न्ह्याःवनेगु अहंकार क्यन धाःसा गालय् क्वब्वाःगु नेपाःया इतिहास दु, झी याकःचा न्ह्याःवनेगु अहंकार मयाये, झीपिं मिले जुयाः न्ह्याः वनेगु खः, राजनीतिक प्रतिस्पर्धा याःसां नं उगु प्रतिस्पर्धा दुने एकता मालेमाः, थ्व गुगु सफलता चूलानाच्वंगु दु एकता व गठबन्धनं हे चूलाःगु खः ।’

उकथं हे जसपाया अध्यक्ष उपेन्द्र यादवं संविधान संशोधन यायेमाःगु माग यानादिल । वय्कलं संविधान संशोधन, नागरिकता समस्या समाधान, वंगु इलय् याःगु प्रतिबद्धता पूवंकेत लिबाके मजिउ व विगतया कमिकमजोरीयात चीकाः राजनीतिक अस्थिरता, दिशाहिनता व अन्यौलता मदयेकेमाः धयादिल ।

उकथं हे नेकपा एकीकृत समाजवादीया अध्यक्ष माधव नेपालं राजनीतिइ हाकुगु सुपाँय् खने दयाच्वंगु दु धासें धयादिल, ‘जिं सावधान यानाच्वना, प्रतिगामी तत्वतय्त धयाच्वना, हाकनं छ्यं ल्ह्वनेगु दुस्साहस याये मते, आः खुसिबाः न्ह्यायेधुंकूगु दु उकियात लिउने न्ह्याके फइ मखु ।’ उकथं हे वय्कलं राजनीतिइ मैमत्त जुयाः छम्हं

मेम्हेसित सम्मान मयायेगु प्रवृत्ति अप्वया वनाच्वंगु दु धासें नेपालय् अप्वः गफ जूगु तर ज्या मजूगु खँ नं धयादिल ।
लोकतान्त्रिक समाजवादी पार्टीया अध्यक्ष महन्थ ठाकुरं थःगु माग सम्बोधन मजुल धाःसा सतक आन्दोलन यायेगु ख्याच्वः बियादिल । ठाकुरं संविधानप्रति थःगु असन्तुष्टि कायम हे दनि धासें थःपिनिगु समस्या सम्बोधन मजुल धाःसा सतकय् वयेत बाध्य जुइगु खँ कनादिल ।

भारतीय जनता पार्टीया नेता हर्षवर्धनं नेपाःया राजनीतिक दलतय्गु संस्कारयात यानादिल । आपालं भूपू प्रधानमन्त्रीत छगू हे दबुली खनेदुगुलिं थः लय्तायागु खँ वय्कलं कनादिल ।

सम्बन्धित बुखँ

LEAVE YOUR COMMENTS